ԵՄ-ի պարտքը երեք տարում կհասնի 900 միլիարդ եվրոյի՝ կորոնավիրուսային համաճարակից հետո վերականգնման ծրագրերը ֆինանսավորելով և Ուկրաինային աջակցելով պայմանավորված։ Այս մասին հայտնում է Financial Times թերթը,- գրում է b24.am-ը:
Ըստ ԵՄ ներկայացուցչի՝ Բրյուսելը արագորեն դարձել է պարտքային շուկաներում «իսկական խաղացող», որի պարտքը ներկայումս կազմում է 450 միլիարդ եվրո՝ ինը անգամ ավելի, քան 2020-ին։
«Մինչև 2026 թվականի վերջ պարտքը կհասնի 900 միլիարդ եվրոյի: Այս ծավալի պարտքը պահանջում է վերաֆինանսավորում», – ասել է եվրոպացի պաշտոնյան Financial Times-ի հետ զրույցում։
Եվրոպական բլոկի սեփական պարտատոմսերի թողարկումը, ինչպես նշում է թերթը, սկսեց արագ աճել այն բանից հետո, երբ անդամ երկրները 2020-ին համաձայնություն ձեռք բերեցին NextGenerationEU ծրագրի ընդհանուր պարտքի շուրջ մինչև 2027-ը պարտավորություն ունենալու։ Եվրոպական տնտեսական վերականգնման և կայուն զարգացման համապարփակ ծրագիրը նպատակ ունի օգնել տնտեսություններին վերականգնվել համաճարակի հետևանքներից և աջակցել Եվրոպայի կանաչ և թվային անցմանը: Դրա իրականացման համար կպահանջվի մոտ 800 միլիարդ եվրո։
Պարտավորությունների համաձայն՝ Բրյուսելը 2028 թվականից պետք է սկսի NextGenerationEU-ի համար վարկերի մարումը։
