Երևան, Հայաստան — Հոկտեմբերի 2, 2024թ.
Այսօր Երևանում տեղի ունեցավ մի իրադարձություն, որը խոստանում է նոր խոսք ասել Հայաստանում կանանց հզորացման մշակույթի մեջ: Իննոբիզ բիզնեսի աջակցման ՀԿ-ն և «Կինը կնոջ համար» համայնքահեն կրթական ծրագիրը ստորագրեցին Փոխըմբռնման հուշագիր (ՓՀ)՝ նշանավորելով մի ռազմավարական գործընկերության սկիզբը, որը նպատակ ունի արդյունավետացնել կանանց կրթական և բիզնես հնարավորությունների լանդշաֆտը:
Այս նորարարական համագործակցությունը ներդաշնակորեն միավորում է Իննոբիզի հարուստ փորձառությունը բիզնեսի աջակցման ոլորտում և «Կինը կնոջ համար» ծրագրի խորը արմատները համայնքներում՝ ստեղծելով մի արդյունավետ հարթակ, որը կոչված է բացահայտելու և զարգացնելու կանանց ներուժը՝ ուշադրության կենտրոնում պահելով հատկապես Արցախից տեղահանված և այլ խոցելի խմբերի ներկայացուցիչների:
Գործընկերության առանցքային նպատակներն են․
Ռեսուրսների միավորում. Երկու կազմակերպությունները միավորում են իրենց ռեսուրսները, կապերն ու փորձառությունը՝ ստեղծելով մի բազմակողմանի էկոհամակարգ կանանց հզորացման համար:
Համայնքային ուժի բազմապատկում. «Կինը կնոջ համար» ծրագրի շնորհիվ ձևավորված ամուր համայնքի ներուժը բազմապատկել ու հզորացնել՝ նպաստելով Հայաստանի Հանրապետության բարգավաճմանը:
Կրթական արդյունքների ճանաչում. ՎԶԵԲ-ի և «Իննոբիզ»-ի կողմից ստեղծված «Բյուր» կրթական հարթակի ավարտական հավաստագիրը կճանաչվի որպես «0-ից Բիզնես» սկսնակ մակարդակի գիտելիքների և հմտությունների հավաստիք՝ բացելով նոր հորիզոններ մասնակիցների առջև:
Մենթորության խթանում. Ճանաչելով մենթորության անգնահատելի դերը կանանց զարգացման ճանապարհին՝ կողմերը նվիրվել են մի դինամիկ միջավայրի ձևավորմանը, որտեղ կանանց փոխադարձ աջակցությունն ու համագործակցությունը կդառնան նրանց հաջողության և հզորացման շարժիչ ուժը:
Մերի Մամիկոնյանը՝ «Կինը կնոջ համար» ծրագրի ղեկավարը, նշել է. «Տարիներ շարունակ բարեգործական և բիզնես ոլորտում ականատես ենք եղել կանանց անգնահատելի նվիրվածության ու ահռելի պոտենցիալ ներուժին։ Այս տարի հումանիտար կարիքներից զատ մեր թիմը իրականացնելու է գործընկերների հետ միասին Արարատ և Լոռի մարզի մեր համայնքի կանանց գիտելիքների ու հմտությունների զարգացման ծրագիր։ Ոգևորված ենք, որ Իննոբիզ ՀԿ-ն կիսում է մեր արժեքները ու ձգտումները։ Վստահ ենք, որ սա առաջին քայլերն են համատեղ մասշտաբային կրթական և մենթորային հարթակի զարգացման ուղղության շրջանակներում»։
Նաիրա Մարգարյանը՝ Իննոբիզ ՀԿ-ի նախագահը, հավելել է. «Մեզ համար կարևոր է չկրկնել այն, ինչ արդեն անում են այլ կազմակերպություններ, փոխարենը՝ կառուցել միմյանց արդյունքների վրա, և «Կինը կնոջ համար» ծրագրի մեր գործընկերները լիովին կիսում են այս մոտեցումը։ Մենք համոզված ենք, որ համագործակցելու և միավորվելու մեր օրինակը ոգեշնչող կլինի, և վստահ ենք, որ մեր շարքերը շուտով կհամալրվեն այլ հիանալի նախաձեռնություններով»:
Հուշագիրն ուժի մեջ է մտնում անմիջապես և ընդգծում է երկու կազմակերպությունների հանձնառությունը շահառուների տվյալների հանդեպ գաղտնիության, միմյանց մտավոր սեփականության հանդեպ հարգանքի և ռեսուրսների պատասխանատու օգտագործման հարցում՝ ի նպաստ իրենց ընդհանուր առաքելության:
