Համաշխարհային բանկը հրապարակել է Հայաստանի տնտեսական զարգացման ամփոփագիրը

Համաշխարհային բանկը (ՀԲ) հրապարակել է Հայաստանի տնտեսական զարգացման ամփոփագիրը, ըստ որի՝ տնտեսական ակտիվության աճի տեմպն օգոստոսին հասել է 10.9%-ի, որը հուլիսին 6% էր: Զեկույցում նշվում է, որ սա հիմնականում պայմանավորված է ոչ առեւտրային ծառայությունների ոլորտով, որը կտրուկ աճ է արձանագրել` հուլիսի 5.8%-ից օգոստոսին հասնելով 13.8%-ի: «Օգոստոսին գնանկումը 0.2% էր, ինչը սեպտեմբերին դարձել է 0.1% գնաճի: Դրա հետեւանքով միջին գնաճը շարունակել է նվազել մինչեւ 2.8%, ինչը զգալիորեն ցածր է 4% թիրախային ցուցանիշից: Միջին գնաճի դանդաղման հիմնական գործոնը սննդամթերքի գների անկումն էր, որը պահպանվել է նաեւ սեպտեմբերին»,- ասված է ՀԲ ամփոփագրում: Նշվում է, որ ՀՀ դրամի վրա ժամանակավոր ազդեցություն է ունեցել սեպտեմբերի 19-ի հարձակումը Լեռնային Ղարաբաղի վրա, «դրան հաջորդած փախստականների ճգնաժամն ու ընդհանուր անորոշությունը»: «Օգոստոսին գրանցվել է բյուջեի 25 միլիարդ ՀՀ դրամ պակասուրդ: Ընդհանուր եկամուտներն ու դրամաշնորհներն օգոստոսին ավելացել են 8.5%-ով, իսկ ծախսերը՝ 18%-ով: Ընթացիկ ծախսերն օգոստոսին 14.5%-ով ավելի է եղել`պայմանավորված սոցիալական աջակցության ու նպաստների 25.6% ավելացմամբ: 2023 թ. առաջին ութ ամիսներին եկամուտներն ավելացել են 14.5%-ով, ինչը պայմանավորված էր ԱԱՀ, եկամտային հարկի ու շահութահարկի մեծ հավաքագրումներով, իսկ ծախսերն ավելացել են 14%-ով`ձեւավորելով 72 միլիարդ ՀՀ դրամ հավելուրդ (կանխատեսված տարեկան ՀՆԱ-ի 0.8%): Ֆինանսական ցուցանիշները մնացել են կայուն. գրանցվել է կապիտալի համարժեքության եւ շահութաբերության ցուցանիշների աննշան փոփոխություն: Օգոստոսին բանկային վարկերն ու ավանդներն ավելացել են, համապատասխանաբար, 1.6 եւ 2.1%-ով` պայմանավորված ՀՀ դրամով արտահայտված վարկերի ու ավանդների ավելացմամբ, որը կնպաստի դոլարիզացման նվազեցմանը»,- ասված է ՀԲ զեկույցում   https://youtu.be/-Gzi6QEUTD8