ԱՄՆ արդյունաբերական և ծառայությունների ոլորտի PMI ինդեքսը փետրվարին կազմել է 50.4՝ գրանցելով վերջին 17 ամիսների նվազագույն ցուցանիշը։
Սպառողների առաջիկա մեկ տարվա գնաճի սպասումները վերջին 15 ամիսների առավելագույն մակարդակին են, իսկ երկարաժամկետ գնաճի հեռանկարը հասել է 1995թ.-ից ի վեր ամենաբարձր կետին։
Փետրվարին Եվրագոտու երկրների տնտեսական ակտիվությունը շատ թույլ է աճում ընդհանուր պահանջարկի կրճատման ֆոնին, իսկ ծառայությունների ոլորտի աճը հազիվ է փոխհատուցում արդյունաբերական ոլորտի անկումը։ Համախառն PMI ինդեքսը փետրվարին կազմել է 50.2՝ անփոփոխ մնալով նախորդ ամսվա համեմատ։
Ճապոնիայում սպառողական գների ինդեքսը հունվարին տարեկան կտրվածքով աճել է 3.2%-ով՝ գրանցելով վերջին 19 ամիսների ամենաարագ աճը։ Տվյալների հրապարակաումից հետո պարտատոմսերի տոկոսադրույքները կտրուկ աճել են՝ պայմանավորված Ճապոնիայի կենտրոնական բանկի կողմից վերաֆինանսավորման տոկոսադրույքի բարձրացման սպասումներով։
Միացյալ թագավորությունում հունվարին սպառողական գների ինդեքսը տարեկան կտրվածքով աճել 3%՝ գրանցելով վերջին 10 ամիսների առավելագույն ցուցանիշը և գերազանցելով Անգլիայի բանկի կանխատեսումներն ու Reuters-ի հարցման արդյունքները։
ԱՄՆ առկա տների վաճառքի ծավալները 3 հաջորդական ամիսների աճից հետո հունվարին կանխատեսվածից մեծ անկում են գրանցել (4.9%), ինչը պայմանավորված է հիփոթեքային վարկերի տոկոսադրույքների աճով։
