ConFEAS 2023 միջազգային հեղինակավոր համաժողովը, որի կազմակերպիչը Եվրո-Ասիական Ֆոնդային Բորսաների Միությունն է , այս տարի անցկացվել է Հայաստանում: Միջոցառումը Հայաստանում անց է կացվում առաջին անգամ՝ նպատակ ունենալով ոլորտի առաջատար մասնագետներին հրավիրել Երևան՝ փորձի փոխանակման և նոր ծանոթություններ հաստատելու համար: Նախորդ տարիներին կոնֆերանսը կազմակերպվել է Աբու Դաբիում և Բուխարեստում: Համաժողովին մասնակցել են մոտ 20 երկրի շուրջ 40 բանախոս, ովքեր քննարկել են կապիտալի շուկայի չորս հիմնական ոլորտներին վերաբերող թեմաներ: Համաժողովի հովանավոր և տեխնոլոգիական գործընկեր Team Telecom Armenia-ի ֆինանսական տնօրեն Կարեն Մնացականյանը կարևորել է կապիտալի շուկայի զարգացման գործում երկրի խոշոր ընկերությունների դերը՝ նշելով․ «Հայաստանում ներդրումներ ապահովելու ամենաարդյունավետ ճանապարհը արժեթղթերի առաջնային շուկայի զարգացումն է և բորսայական առևտրի ակտիվացումը։ Իսկ այս համաժողովը այն անհրաժեշտ հարթակն է, որտեղ մեր միջազգային գործընկերների հետ կարող ենք քննարկել կապիտալի շուկայում առկա հնարավորություններն ու բացերը՝ գտնելու լավագույն լուծումները։ Team-ը օրեր առաջ հայտարարեց առաջնային հրապարակային առաջարկի միջոցով բաժնետոմսերի տեղաբաշխման մեկնարկի մասին։ Սա հանրային ու բաց գործելուն, ինչպես նաև ֆինանսական շուկայի զարգացմանը նպաստելուն ուղղված կարևոր քայլ է։ Կարծում եմ՝ ցուցակված ընկերություն դառնալը պետք է դառնա վարակիչ նաև մյուս ընկերությունների համար»։ Միջոցառումն իր տեսակով կոնֆերանս-քննարկում էր, որի ընթացքում միության անդամ բորսաներն ու դեպոզիտարիաները, ինչպես նաև ֆինանսական ոլորտի հատուկ հյուրերը, ինչպես Հայաստանից, այնպես էլ այլ երկրներից, պանելային քննարկման եղանակով խոսել են կապիտալի շուկայի արդի հիմնահարցերի, մարտահրավերների ու հնարավորությունների մասին:   https://www.youtube.com/watch?v=DvuxDcc44pM