Գերբեռնված մեքենաները տուգանվում են Հանրապետությունում իրականացվող ասֆալտապատմանը զուգահեռ գերբեռնված մեքենաները վնասում են ճանապարհները: ահազանգում է ոլորտը վերահսկող տեսչականը: Քաղաքաշինության տեխնիկական և հրդեհային անվտանգության տեսչական մարմնի մասնագետները Վաղարշապատ-Երևան ճանապարհին հերթով կշռում, ստուգում են ծանրաքաշ և մեծ եզրաչափերով բեռնատարների թույլատրելի բեռնվածությունը: Այդպիսի տրանսպորտային միջոցը միջպետական նշանակության ճանապարհներին քաշող սռնու վրա պետք է ունենա առավելագույնը 11.5 տոննա բարձվածություն՝ բացատրում է տեսչականի մասնագետը, հանրապետական նշանակության ճանապարհներին՝ 10, տեղական ճանապարհներին՝ 8 տոննա: Տուգանքի չափը 200.000 դրամ է, եթե չմասնատվող բեռ է, օրինակ՝ մեծ քար է տեղափոխում, տուգանքի այդ չափը յուրաքանչյուր տոննայի համար է: Շարժական այս կշեռքներին շուտով կփոխարինեն անշարժները, տեսչականը նախատեսում է առաջիկայում Սիսիանում 24-ժամյա ծառայություն սկսել: Զուգահեռ մշակվում է Վարչական իրավախախտումների վերաբերյալ օրենսգրքի փոփոխության, լրացման նախագիծ, ըստ որի՝ մինչև 3 տոննա գերբեռնվածության համար վարորդը կտուգանվի 200.000 դրամով, դրանից հետո յուրաքանչյուր ավելի ամեն տոննայի համար էլ կլինի ևս 200.000 դրամ: