Դոնալդ Թրամփը ստորագրել է հրամանագիր, որով սահմանվում են նոր մաքսատուրքեր 68 երկրի և ԵՄ-ի նկատմամբ

Մաքսատուրքերը կսկսեն գործել 2025 թվականի օգոստոսի 7-ից։

Մաքսատուրքերը տարբեր են ըստ երկրների։ ԵՄ երկրների ապրանքների նկատմամբ սահմանվել է 15% մաքսատուրք։

Ղազախստանից և Մոլդովայից ներմուծվող ապրանքների վրա սահմանվել է 25% մաքսատուրք։ ԵՄ անդամ չհանդիսացող որոշ երկրների նկատմամբ սահմանվել են հետևյալ մաքսատուրքերը՝ Սերբիա՝ 35%, Շվեյցարիա՝ 39%, Ալժիր և Բոսնիա և Հերցեգովինա՝ 30%, Իրաք՝ 35%, Լաոս և Մյանմա՝ 40%, Սիրիա՝ 41%։

Կանադայի նկատմամբ մաքսատուրքերը բարձրացվել են 25%-ից մինչև 35%։ Այնուամենայնիվ, ԱՄՆ-Մեքսիկա-Կանադա համաձայնագրով սահմանված արտոնյալ մաքսային ռեժիմով իրականացվող առևտուրը չի ընդգրկվում նոր սահմանափակումների շրջանակում։

Նշվել է, որ այն երկրների դեպքում, որոնք բացակայում են հրամանագրում, կիրառվելու է հիմնական մաքսատուրք՝ 10%։

Երկրներից մի քանիսը (Մալայզիա, Կամբոջա, Թաիլանդ) ընդգրկվել են նվազեցված մաքսատուրքերի ցանկում։ Մալայզիայի մաքսատուրքը սահմանվել է 19%՝ նախապես նախատեսված 24%-ի փոխարեն, Կամբոջայինը՝ 19%՝ նախկին 49%-ի փոխարեն, իսկ Թաիլանդինը՝ 19%՝ նախկին 36%-ի փոխարեն։

Վարչապետ Վիկտոր Օրբանը քննադատել է այս որոշումը՝ նշելով, որ Հունգարիան տարեկան շուրջ 11 միլիարդ դոլարի արտահանում է իրականացնում ԱՄՆ։ Նա հայտարարել է, որ Հունգարիան մշակելու է ազգային գործողությունների պլան։

Սերբիայի և Շվեյցարիայի իշխանությունները նույնպես դժգոհություն են հայտնել մաքսատուրքերի բարձր մակարդակի կապակցությամբ և հայտնել են, որ հույս ունեն բանակցությունների միջոցով հասնել լուծման։

Շվեյցարիայի բիզնես շրջանակները, այդ թվում՝ տեխնոլոգիական և ժամագործական ոլորտների ներկայացուցիչներ, արտահայտել են մտահոգություն՝ կապված հնարավոր կորուստների և աշխատատեղերի կրճատման ռիսկերի հետ։