ԱՄՆ-ը հաստատել է Սաուդյան Արաբիային F-15 կործանիչների սպասարկման ծառայությունների հնարավոր տրամադրումը՝ մինչև 3 մլրդ դոլար արժեքով

Վաշինգտոնի վարչակազմը պաշտոնապես ծանուցել է ԱՄՆ Կոնգրեսին հնարավոր գործարքի մասին։

ԱՄՆ Պետդեպարտամենտը հաստատել է Սաուդյան Արաբիային մինչև 3 միլիարդ դոլար ընդհանուր արժեքով F-15 կործանիչների սպասարկման ծառայությունների և հարակից սարքավորումների հնարավոր տրամադրումը։ Տեղեկությունը հրապարակել է Պենտագոնի Պաշտպանական անվտանգության համագործակցության գործակալությունը (DSCA)։

Գործակալության հաղորդագրության համաձայն՝ Սաուդյան Արաբիայի իշխանությունները ԱՄՆ-ից դիմել են F-15 ինքնաթիռների վերանորոգման և տեխնիկական սպասարկման ծառայությունների, պահեստամասերի, ծրագրային ապահովման, ինչպես նաև մի շարք համակարգերի մատակարարման համար։ Փաստաթղթում նշվում է, որ գործարքի ընդհանուր արժեքը գնահատվում է մոտ 3 միլիարդ դոլար։

DSCA-ն ընդգծում է, որ առաջարկվող վաճառքը համապատասխանում է ԱՄՆ արտաքին քաղաքականության և ազգային անվտանգության նպատակներին՝ նպաստելով ՆԱՏՕ-ի անդամ չհանդիսացող, սակայն Վաշինգտոնի համար կարևոր դաշնակցի անվտանգության ամրապնդմանը։

Վաշինգտոնի վարչակազմը պաշտոնապես ծանուցել է ԱՄՆ Կոնգրեսին հնարավոր գործարքի մասին։ Օրենսդիր մարմինը ունի 30 օր ժամկետ՝ առաջարկը քննարկելու և անհրաժեշտության դեպքում այն արգելափակելու համար։ Պենտագոնի հավաստմամբ՝ սպասարկման ծառայությունների և սարքավորումների տրամադրումը չի վնասի ԱՄՆ զինված ուժերի մարտունակությանը։

Հիշեցվում է, որ ԱՄՆ նախագահ Դոնալդ Թրամփը 2025 թվականի նոյեմբերի 18-ին հայտարարել էր Սաուդյան Արաբիային ՆԱՏՕ-ից դուրս Վաշինգտոնի հիմնական դաշնակցի կարգավիճակ շնորհելու մասին։ Այդ ժամանակ հայտարարվել էր նաև պաշտպանության ոլորտում ռազմավարական համաձայնագրի ստորագրման մասին։

ՆԱՏՕ-ից դուրս հիմնական դաշնակցի կարգավիճակը հեշտացնում է ԱՄՆ-ի և տվյալ երկրի միջև ռազմական համագործակցությունը, սակայն չի ենթադրում փոխադարձ պաշտպանության պարտավորություններ։ Սպիտակ տունը նախկինում տեղեկացրել է, որ ԱՄՆ-ը նախատեսում է Սաուդյան Արաբիային վաճառել լայնածավալ սպառազինություն, այդ թվում՝ F-35 հինգերորդ սերնդի կործանիչ-ռմբակոծիչներ և շուրջ 300 տանկ։