Թրամփը ողջունել է TikTok-ի շուրջ գործարքը

TikTok-ի չինական սեփականատեր ByteDance ընկերությունը հայտարարել է, որ ավարտին է հասցրել ԱՄՆ-ում մեծամասամբ ամերիկյան սեփականությամբ համատեղ ձեռնարկություն ստեղծելու շուրջ գործարքը։ Նպատակն է ապահովել ամերիկացի օգտատերերի տվյալների անվտանգությունը և կանխել կարճ տեսանյութերի հարթակի հնարավոր արգելքը, որը ԱՄՆ-ում ունի ավելի քան 200 միլիոն օգտատեր։

Այս համաձայնությունը կարևոր փուլ է TikTok-ի համար՝ երկարատև քաղաքական և իրավական հակասություններից հետո, որոնք սկիզբ էին առել դեռևս 2020 թվականի օգոստոսին։ Այդ ժամանակ ԱՄՆ նախագահ Դոնալդ Թրամփը փորձել էր արգելել հարթակի գործունեությունը՝ ազգային անվտանգության նկատառումներով։

Ավելի ուշ Թրամփը չի կիրառել 2024 թվականի ապրիլին ընդունված օրենքը, որը պարտադրում էր ByteDance-ին մինչև 2025 թվականի հունվար վաճառել ԱՄՆ-ում իր ակտիվները։ Օրենքի չկատարումը կարող էր հանգեցնել TikTok-ի արգելմանը ԱՄՆ-ում, իսկ այն հաստատվել էր նաև ԱՄՆ Գերագույն դատարանի կողմից։

Դոնալդ Թրամփը սոցիալական ցանցում հրապարակած գրառմամբ ողջունել է գործարքը՝ նշելով, որ TikTok-ը «այժմ պատկանում է ամերիկացի հայրենասերների և ներդրողների մեծ խմբի՝ աշխարհի խոշորագույններից մեկին»։ Նա նաև շնորհակալություն է հայտնել Չինաստանի նախագահ Սի Ծինփինին՝ համագործակցության և գործարքը վերջնականապես հաստատելու համար։

«Նա կարող էր ընտրել այլ ուղի, բայց այդպես չվարվեց, և ես բարձր եմ գնահատում նրա որոշումը»,- գրել է ԱՄՆ նախագահը։