Չարլի Քիրքի սպանությունից հետո Թրամփի վարչակազմն անվտանգության համար Կոնգրեսից ևս 58 միլիոն դոլար է պահանջում

Վարչակազմը հայտնել է նաև, որ աջակցում է օրենսդիրների պաշտպանության միջոցների ընդլայնմանը

ԱՄՆ նախագահ Դոնալդ Թրամփի վարչակազմը Կոնգրեսից պահանջել է լրացուցիչ 58 միլիոն դոլար հատկացնել՝ գործադիր և դատական իշխանությունների անվտանգության ուժեղացման համար՝ պահպանողական գործիչ Չարլի Քիրքի սպանությունից հետո, հայտնում է Bloomberg-ը՝ հղում անելով Սպիտակ տան ներկայացուցչին։

Լրացուցիչ ֆինանսավորման ներառման հարցումը ներկայացվում է մինչև սեպտեմբերի 30-ը՝ մինչև գործող դաշնային ծախսային օրենքի ժամկետի ավարտը։

Վարչակազմը հայտնել է նաև, որ աջակցում է օրենսդիրների պաշտպանության միջոցների ընդլայնմանը, սակայն որոշման մանրամասները թողել է օրենսդիր մարմնի հայեցողությանը, նշում է աղբյուրը։

Քիրքի սպանությունը, որը տեղի է ունեցել այս շաբաթ Յուտա նահանգի համալսարանական միջոցառման ժամանակ, նոր մտահոգություններ է առաջացրել պետական պաշտոնյաների անվտանգության վերաբերյալ, հատկապես՝ անցյալ տարի Դոնալդ Թրամփի դեմ իրականացված մահափորձից հետո։

Հանրապետականները պնդում են, որ անհրաժեշտ է ընդունել կարճաժամկետ ծախսային օրինագիծ՝ կառավարության աշխատանքը հաջորդ ամսում շարունակելու համար, սակայն առայժմ մերժում են դեմոկրատների պահանջները՝ առողջապահության դրույթների ներառման վերաբերյալ։
Հանրապետականները ստիպված կլինեն ստանալ դեմոկրատների աջակցությունը՝ ծախսերի ավելացման միջոցներ ընդունելու համար։