ԵՄ-ում ապաստան հայցող ՀՀ քաղաքացիների թիվը 2025-ին կրճատվել է ավելի քան մեկ երրորդով

2025 թվականին ԵՄ անդամ երկրներում ապաստան է հայցել 2850 ՀՀ քաղաքացի:

Եվրամիության անդամ երկրներում ապաստան հայցող Հայաստանի քաղաքացիների թիվը 2025 թվականին էականորեն նվազել է։ Այդ մասին սոցիալական ցանցի իր էջում հայտնել է ՀՀ Ազգային ժողովի Եվրոպական ինտեգրման հարցերի մշտական հանձնաժողովի նախագահ, ՔՊ պատգամավոր Արման Եղոյանը՝ հղում կատարելով Եվրոստատի տվյալներին։

Նրա փոխանցմամբ՝ 2025 թվականին ԵՄ անդամ երկրներում ապաստան է հայցել 2850 ՀՀ քաղաքացի, ինչը ավելի քան 34 տոկոսով պակաս է 2024 թվականի ցուցանիշից, երբ այդ թիվը կազմել էր 4330։ Միաժամանակ, այն շուրջ 46 տոկոսով ցածր է 2009–2017 թվականների տարեկան միջին ցուցանիշից, որը կազմել է մոտ 5280 քաղաքացի։

Եղոյանը նշել է, որ վերջին տասնամյակների ընթացքում ավելի քիչ ապաստան հայցելու դեպքեր գրանցվել են միայն 2020 և 2021 թվականներին, ինչը պայմանավորված էր կորոնավիրուսի համավարակով, լոքդաուններով և օդային ուղևորափոխադրումների կտրուկ կրճատմամբ։

Պատգամավորի գնահատմամբ՝ ապաստան հայցողների թվի նվազման միտումը կարող է շարունակվել նաև առաջիկա տարիներին՝ առողջապահության համընդհանուր ապահովագրության համակարգի ներդրման պայմաններում։

Նա նաև արձագանքել է այն տեսակետներին, թե նվազումը կարող է պայմանավորված լինել Եվրամիություն մեկնելու սահմանափակումներով։ Ըստ ներկայացված տվյալների՝ 2025 թվականին 2024-ի համեմատ Հայաստանից ԵՄ օդային ճանապարհով ուղևորափոխադրումների թիվն աճել է շուրջ 178 հազարով, որից 87 հազարը՝ մեկնումների, իսկ 91 հազարը՝ ժամանումների աճն է։

Եղոյանի խոսքով՝ դա վկայում է, որ ԵՄ հասնելու ֆիզիկական հնարավորությունները չեն նվազել, այլ նվազել է այնտեղ ապաստան հայցելու և մնալու անհրաժեշտությունը կամ ցանկությունը։ Նրա գնահատմամբ՝ 2025 թվականն այդ առումով կարելի է համարել բեկումնային։