Կառավարությունը սահմանում է պետական նոր տուրք՝ մշակութային արժեքների արտահանման համար

Ներկայում մշակութային արժեքների արտահանման ոլորտում մաքսային ռեժիմների հստակ տարանջատում չկա։

ՀՀ կառավարությունը հունվարի 15-ի նիստում որոշում է կայացրել, որով նախատեսվում է Հայաստանից մշակութային արժեքների արտահանման համար սահմանել պետական նոր տուրք։

Այդ նպատակով փոփոխություններ կկատարվեն «Պետական տուրքի մասին» ՀՀ օրենքում՝ ապահովելու համար մշակութային արժեքների հետ կապված մաքսային գործառնությունների ամբողջական ընդգրկումը Եվրասիական տնտեսական միության (ԵԱՏՄ) մաքսային օրենսդրության շրջանակում։

Նախագծի ընդունման արդյունքում պետական տուրքի տեսակները կհամապատասխանեցվեն ԵԱՏՄ-ում արդեն իսկ գործող կարգավորումներին, ինչպես նաև ակնկալվում է վարչարարության արդյունավետության բարձրացում։ Սա հնարավորություն կտա առավել հստակ և համակարգված կարգավորել մշակութային արժեքների արտաքին առևտուրը։

Նախագծի հիմնավորման մեջ նշվում է, որ օրենսդրական փոփոխությունները պայմանավորված են Հայաստանի համար կարևոր նշանակություն ունեցող մշակութային արժեքների արտահանման և ներմուծման գործընթացների կանոնակարգման անհրաժեշտությամբ։

Մասնավորապես ընդգծվում է, որ ներկայում մշակութային արժեքների արտահանման ոլորտում մաքսային ռեժիմների հստակ տարանջատում չկա։ Առաջարկվող փոփոխություններով նախատեսվում է այդ բացը լրացնել՝ սահմանելով հստակ տարբերակումներ և գործառնական մեխանիզմներ։