Սեպտեմբերի 25-ի բիզնես լուրերը

Տեղական

Պետբյուջե 2026
Կառավարությունը հաստատել է 2026թ․ պետական բյուջեի նախագիծը, որը կուղարկվի ԱԺ։ Եկամուտները նախատեսվում են 3 տրլն 91 մլրդ դրամ, ծախսերը՝ 3 տրլն 628 մլրդ դրամ, իսկ պակասորդը՝ 537 մլրդ դրամ՝ ՀՆԱ-ի 4.5%-ը։

Տնտեսական ակտիվության աճ
2025թ․ հունվար-օգոստոս ամիսներին ՏԱՑ-ը աճել է 7.1%-ով։ Առևտրի շրջանառությունն ավելացել է 3.9%-ով, շինարարությունը՝ 20.4%-ով, ծառայությունները՝ 10.2%-ով, մինչդեռ արդյունաբերությունը նվազել է 7.8%-ով։

Հետվճարներ կենսաթոշակառուներին և նպաստառուներին
ԱՍՀ նախարարության տվյալներով՝ հոկտեմբեր-դեկտեմբեր ամիսների համար հետվճարների տրամադրման նպատակով կտրամադրվի 3 մլրդ 219 մլն դրամ։ Հետվճարները կազմում են գործարքների 12%-ը, բայց ոչ ավելի, քան 6000 դրամ։

Փոխանցումների հիմնական աղբյուրը՝ Ռուսաստանը
2025թ․ հուլիսին արտերկրից ՀՀ բանկերի միջոցով ստացված փոխանցումների ծավալը կազմել է 533.2 մլն դոլար։ Դրանցից 64.8%-ը՝ 345.4 մլն դոլար, փոխանցվել է Ռուսաստանից։

Միջազգային

ԵԱՏՄ–Իրան նոր ճանապարհային քարտեզ
ԵԱՏՄ-ի և Իրանի միջև ստորագրվել է երեք տարվա համագործակցության ճանապարհային քարտեզ։ Այն ներառում է տրանսպորտ, լոգիստիկա, «Հյուսիս-հարավ» միջանցք, ինչպես նաև կանաչ մաքսային միջանցքների ձևավորում։

ՌԴ բյուջեի կանխատեսված դեֆիցիտ
Ռուսաստանի ֆինանսների նախարարության տվյալներով՝ 2026թ․ բյուջեի դեֆիցիտը կկազմի ՀՆԱ-ի 1.6%։ 2027-ին այն կնվազի մինչև 1.2%, իսկ 2028-ին՝ 1.3%։

ԱՄՆ նավթի պաշարների անկում
ԱՄՆ-ում նավթի պաշարները մեկ շաբաթում նվազել են 607 հազար բարելով՝ հասնելով 414.8 մլն-ի։ Մասնագետները կանխատեսում էին աճ, սակայն արձանագրվել է անկում։

G7-ի քննարկումները հազվագյուտ մետաղների շուրջ
G7-ի առաջնորդները դիտարկում են նվազագույն գների սահմանման հնարավորությունը հազվագյուտ մետաղների համար։ Քննարկվում է նաև ներդրումների խստացված կարգավորման տարբերակը՝ կախվածությունը Չինաստանից նվազեցնելու նպատակով։

Հետաքրքիր

Երևանի օդի որակի վերաբերյալ ՇՄՆ պարզաբանումը
Շրջակա միջավայրի նախարարությունը հայտարարել է, որ սխալ է պնդել, թե Երևանը տարածաշրջանում ունի ամենավատ օդի որակը։ Պաշտոնական տվյալները ցույց են տալիս, որ նման գնահատականները հիմնավորված չեն։