Լեհական ոստիկանությունը հայտարարել է թմրանյութերի մաքսանենգության մի քանի փոխկապակցված ցանցերի վնասազերծման մասին, որոնք գործել են ամբողջ Եվրոպայում։ Ըստ Լեհաստանի Կենտրոնական քննչական բյուրոյի (CBSP)՝ առգրավվել են 1 միլիարդ զլոտի (275 միլիոն դոլար) արժողությամբ թմրանյութեր։
CBSP-ն հայտարարել է, որ հանցավոր խմբերի միջուկը Իսպանիայում բնակվող լեհերն են եղել: Ոստիկանությունը հայտնել է, որ խմբերի որոշ անդամներ կապեր են ունեցել լեհ ֆուտբոլային խուլիգանների հետ:
«Հետաքննության ընթացքում առգրավվել է 600 կիլոգրամ մարիխուանա, 180 կիլոգրամ հաշիշ, 40 կիլոգրամ ամֆետամինի սուլֆատ, ինչպես նաև յոթ միավոր հրազեն և մի քանի հարյուր փամփուշտ», - հայտնել է CBSP-ն։
Հիմնական խումբը ներգրավված է եղել Եվրոպայի մի շարք շրջաններում իրականացվող թմրանյութերի ապօրինի շրջանառության մեջ, հիմնականում՝ Իռլանդիայում, Գերմանիայում, Ավստրիայում և Սկանդինավիայում։
Հետաքննությունը համատեղ կերպով անցկացվել է Եվրամիության մի շարք երկրների իրավապահ մարմինների հետ։
Հետաքննության շրջանակներում իրավապահ մարմինների աշխատակիցները առգրավել են ավելի քան 50 միլիոն զլոտի արժողությամբ գույք, ինչպես նաև շքեղ ժամացույցներ և մեքենաներ։
Մեղադրանք է առաջադրվել ավելի քան 170 անձի, որոնցից ավելի քան 110-ը տարբեր ժամանակներում ձերբակալվել են: Հետաքննությունը շարունակվում է: Անհատական գործերը հետևողականորեն փակվում են՝ մեղավորության դատավճիռներով:
Առաջին դատավճիռներն արդեն կայացվել են՝ 10 տարուց ավելի ազատազրկման տեսքով պատիժներով։
