Նոյեմբերի 11-ի կարևոր լուրերը

Ինչ է կատարվել Հայաստանում և աշխարհում

ԱՄՆ Սենատը հաստատել է կառավարության վերաբացման օրինագիծը

ԱՄՆ Սենատը 60 կողմ և 40 դեմ ձայներով ընդունել է կառավարության վերաբացման օրինագիծը, որն ապահովում է պետական ծառայողների հետադարձ աշխատավարձ և ֆինանսավորում մինչև 2026 թվականը։ Օրինագիծը կուղարկվի Ներկայացուցիչների պալատ՝ քվեարկության, և դրա ընդունմամբ կավարտվի ԱՄՆ պատմության ամենաերկար՝ 40-օրյա շաթդաունը։

Նյու Դելիում՝ մահաբեր պայթյուն Կարմիր բերդի մոտ

Ավտոմեքենայի պայթյունի հետևանքով Նյու Դելիում զոհվել է 13 մարդ, ավելի քան 10-ը վիրավորվել են։ Տեղում այրվել են մի քանի ավտոմեքենաներ, ոստիկանությունը շրջափակել է տարածքը, իսկ մետրոն, կառավարական շենքերն ու օդանավակայանը տեղափոխվել են բարձր պատրաստականության ռեժիմ։

Արզականում՝ ապօրինի հանքարդյունահանում 24 մլն դրամի վնասով

Արզական գյուղում ապօրինի մարմարի հանքարդյունահանում իրականացրած ընկերության պատասխանատուները ձերբակալվել են։ Արդյունահանվել է շուրջ 1500 խմ մարմար՝ մոտ 24 մլն դրամ արժողությամբ։ Պետությանը և համայնքին պատճառվել է առանձնապես խոշոր վնաս։

Ուկրաինական պատերազմը չի սպառնում համաշխարհային պատերազմով․ Թրամփ

ԱՄՆ նախագահ Դոնալդ Թրամփը հայտարարել է, որ Ուկրաինայի շուրջ իրավիճակը վերահսկվում է և այլևս չի սպառնում համաշխարհային պատերազմի վտանգով։ Նա ընդգծել է, որ իր կառավարման դեպքում պատերազմը երբեք չէր սկսվի։

Ռուսաստանը արագ է արձագանքում Հայաստանի կարիքներին․ Մարիա Զախարովա

ՌԴ ԱԳՆ ներկայացուցիչ Մարիա Զախարովան նշել է, որ Մոսկվան անմիջապես է արձագանքում Հայաստանի օգնության կարիքներին՝ հիշեցնելով 2024-ի հունիսյան հեղեղումների հետևանքով երկաթուղու վերականգնումը և ռուսական ցորենի մատակարարումը Ադրբեջանի ու Վրաստանի տարածքներով։

Հայաստանի ՀՆԱ-ն՝ 8,970 դոլար մեկ շնչի հաշվով

ԱՄՀ տվյալներով՝ Հայաստանի մեկ շնչի ՀՆԱ-ն կազմում է մոտ 8,970 ԱՄՆ դոլար։ Համեմատության համար՝ Վրաստանում այն 10,130 դոլար է, Ադրբեջանում՝ 7,370, Իրանում՝ 4,070։

Հայաստանում գնաճը դանդաղել է մինչև 3.7%․ ԵԶԲ

Եվրասիական զարգացման բանկի վերլուծությամբ՝ հոկտեմբերին Հայաստանում տարեկան գնաճը կազմել է 3.7%՝ նվազելով սեպտեմբերի 3.8%-ից։ Գնաճի հիմնական պատճառը սննդամթերքի գների աճն է։

Հայաստան–Սաուդյան Արաբիա տնտեսական համագործակցություն

Ռիադում ՀՀ էկոնոմիկայի նախարար Գևորգ Պապոյանը հանդիպել է Սաուդյան Արաբիայի գործընկերոջ՝ Ֆայսալ Ալիբրահիմի հետ։ Քննարկվել են տեխնոլոգիաների, էներգետիկայի, գյուղատնտեսության և զբոսաշրջության ոլորտներում համագործակցության ծրագրեր։

Պատշաճ ծանուցումների էլեկտրոնային համակարգ կգործարկվի

Արդարադատության նախարար Սրբուհի Գալյանի խոսքով՝ քաղաքացիների ծանուցումների համար կստեղծվի էլեկտրոնային հարթակ՝ ապահով նույնականացմամբ։ Եթե անձը 3 օրվա ընթացքում չմուտք գործի հարթակ, ծանուցումը կհամարվի առաքված։

Ավտոմեքենաների վաճառքն ու սպասարկումը՝ +7% աճով

Վիճակագրական կոմիտեի տվյալներով՝ 2025-ի առաջին 9 ամիսներին ավտոմեքենաների և պահեստամասերի վաճառքն ու սպասարկման ծավալները աճել են 7%-ով՝ հասնելով 189 մլրդ դրամի։

Չինաստանը շարունակում է մնալ ոսկու խոշորագույն արտադրողը

Չինաստանը 2025-ի հունվար-սեպտեմբերին արտադրել է 271.78 տոննա ոսկի՝ 1%-ով ավելի, քան նախորդ տարի, չնայած սպառման նվազմանը՝ 8%-ով։

Բրիտանիայում անշարժ գույքի գները հասել են ռեկորդային մակարդակի

Հոկտեմբերին բնակարանների գներն աճել են 0.6%-ով՝ հասնելով միջինում 299,862 ֆունտի։ Տարեկան աճը կազմել է 1.9%՝ գերազանցելով կանխատեսումները։

Թուրքիայի կենտրոնական բանկը բարձրացրել է գնաճի կանխատեսումը

Թուրքիայի կենտրոնական բանկը 2025-ի գնաճի կանխատեսումը վերանայել է՝ 25–29%-ից հասցնելով 31–33% միջակայքի։ Սեպտեմբերին տարեկան գնաճը կազմել է 33.29%։