Մեկնարկում է գյուղատնտեսական կենդանիների անվճար պատվաստման ծրագիրը

Տարեկան նախատեսվում է իրականացնել շուրջ 5 միլիոն կանխարգելիչ և ախտորոշիչ միջոցառում։

Հայաստանի ամբողջ տարածքում մեկնարկում է գյուղատնտեսական կենդանիների պատվաստման պետական ծրագրի հերթական փուլը։ Այս մասին հայտնում են ՀՀ էկոնոմիկայի նախարարությունից։

Ծրագրի շրջանակում իրականացվելու են կանխարգելիչ միջոցառումներ սիբիրախտի, դաբաղի և էմկար հիվանդության դեմ։ Հաջորդ փուլերում նախատեսվում են նաև միջոցառումներ հանգուցավոր մաշկաբորբի, ինչպես նաև բրուցելոզի, լեյկոզի և տուբերկուլյոզի նկատմամբ։

Նախարարության տվյալներով՝ պատվաստումները իրականացվում են անվճար՝ պետական պատվերի շրջանակում։

Տարեկան նախատեսվում է իրականացնել շուրջ 5 միլիոն կանխարգելիչ և ախտորոշիչ միջոցառում։ Ծրագրի ընդհանուր բյուջեն, ներառյալ պատվաստանյութերի ձեռքբերումը, կազմում է 1.9 միլիարդ դրամ։

Ծրագիրը ուղղված է անասնապահության ոլորտում վարակիչ հիվանդությունների տարածման կանխմանը և կենդանիների առողջության պահպանմանը, ինչը կարող է ազդեցություն ունենալ արտադրության կայունության վրա։