ՅՈՒՆԵՍԿՕ-ն զգուշացնում է Միջերկրական ծովում ցունամիների ռիսկի մասին

Միջերկրական ծովում ցունամիների դեպքում նախազգուշացման ժամանակը կարող է լինել սահմանափակ։

ՅՈՒՆԵՍԿՕ-ն զգուշացրել է Միջերկրական ծովում առաջիկա տասնամյակներում ցունամիների բարձր ռիսկի մասին, այդ թվում՝ Ֆրանսիայի ափամերձ հատվածներում։

Փորձագետների գնահատմամբ՝ Միջերկրական ծովը չի կարող դիտարկվել որպես ցածր ռիսկային գոտի։ Պատմական տվյալները ցույց են տալիս, որ կործանարար ալիքները բազմիցս հասել են տարածաշրջանի տարբեր ափերին։

Գիտնականների կարծիքով՝ ցունամիները կարող են առաջանալ ոչ միայն երկրաշարժերի հետևանքով, այլ նաև ստորջրյա սողանքների կամ հրաբխային ակտիվության արդյունքում։

Ռիսկը կապված է ոչ միայն ալիքների բարձրության, այլ նաև ուժեղ ջրային հոսանքների հետ, որոնք կարող են հեղեղել նավահանգիստները և վնասել ափամերձ ենթակառուցվածքները։

Օրինակներից մեկը գրանցվել է 1979 թվականին Նիսում, երբ ստորջրյա սողանքը առաջացրել է ալիք, որի հետևանքով զոհվել է ութ մարդ։ Նմանատիպ ազդեցություն արձանագրվել է նաև 2003 թվականին Ալժիրում տեղի ունեցած երկրաշարժից հետո։

Գիտնականները նաև նշում են, որ Միջերկրական ծովում ցունամիների դեպքում նախազգուշացման ժամանակը կարող է լինել սահմանափակ՝ երբեմն ընդամենը մի քանի րոպե, ինչը բարձրացնում է ռիսկերի կառավարման կարևորությունը։