Netflix-ը շուրջ 7 մլրդ դոլարով ձեռք է բերել Sony Pictures-ի ֆիլմերի համաշխարհային սթրիմինգային բացառիկ իրավունքները

Netflix-ը նաև կլիցենզավորի Sony Pictures-ի ֆիլմադարանից ընտրված ֆիլմեր և սերիալներ։

Ամերիկյան Netflix Inc.-ը ձեռք է բերել Sony Pictures Entertainment-ի (SPE) լիամետրաժ ֆիլմերի բացառիկ համաշխարհային սթրիմինգային իրավունքները՝ դրանց կինոթատրոնային ցուցադրությունից և pay-per-view մոդելով հեռարձակումից հետո։ Այս մասին ասվում է Netflix-ի և Sony Pictures-ի համատեղ հայտարարության մեջ։

Բազմամյա գործարքի իրականացումը կսկսվի 2026 թվականին՝ աստիճանաբար, ըստ առանձին տարածաշրջաններում իրավունքների հասանելիության։ Ընկերությունների համաձայնությամբ Netflix-ը լիարժեք համաշխարհային ծածկույթ կստանա 2029 թվականի սկզբին։

Հիշեցնենք, որ դեռևս 2021 թվականին Netflix-ը ստացել էր Sony Pictures-ի ֆիլմերի հեռարձակման իրավունքները ԱՄՆ-ում, Գերմանիայում և Հարավարևելյան Ասիայի մի շարք երկրներում։ Նոր համաձայնագիրը էապես ընդլայնում է այդ համագործակցությունը՝ այն դարձնելով գլոբալ։

Գործարքի շրջանակում Netflix-ը նաև կլիցենզավորի Sony Pictures-ի ֆիլմադարանից ընտրված ֆիլմեր և սերիալներ՝ հարթակի բովանդակային գրադարանը համալրելու նպատակով։

Չնայած գործարքի ճշգրիտ ֆինանսական պայմանները պաշտոնապես չեն հրապարակվել, Bloomberg-ի աղբյուրների փոխանցմամբ՝ համաձայնագիրը նախատեսված է մինչև 2032 թվականը ներառյալ, իսկ դրա արժեքը գնահատվում է շուրջ 7 միլիարդ դոլար։

Փորձագետների գնահատմամբ՝ այս քայլը Netflix-ին թույլ կտա ուժեղացնել իր դիրքերը գլոբալ սթրիմինգային շուկայում՝ խորացնելով համագործակցությունը խոշոր կինոստուդիաների հետ և ապահովելով բարձրարժեք բովանդակության երկարաժամկետ հասանելիություն։