ԿԳՄՍ նախարարությունը հերքում է 231 դպրոց փակելու մասին լուրերը

Ներկայում հանրապետությունում ընթանում են դպրոցաշինության լայնածավալ աշխատանքներ։

ՀՀ կրթության, գիտության, մշակույթի և սպորտի նախարարությունը պաշտոնապես տեղեկացնում է, որ վերջին օրերին տարբեր հարթակներում տարածվող տեղեկությունները, թե իբր 2026 թվականի սեպտեմբերից Հայաստանում նախատեսվում է փակել 231 դպրոց, չեն համապատասխանում իրականությանը և հանդիսանում են ապատեղեկատվություն։

Նախարարությունից ընդգծում են, որ կրթության ոլորտում իրականացվող պետական քաղաքականությունը միտված է հանրակրթության արդյունավետ զարգացմանը, կրթության հասանելիության ընդլայնմանը և որակի բարձրացմանը, այլ ոչ թե կրթական հնարավորությունների սահմանափակմանը։

Հայտարարության մեջ նշվում է, որ ներկայում հանրապետությունում ընթանում են դպրոցաշինության լայնածավալ աշխատանքներ, որոնց արդյունքում տարբեր բնակավայրերում պարբերաբար բացվում են նոր դպրոցներ և մանկապարտեզներ։

Նախարարությունը ցավալի է համարում, որ կրթության ոլորտը շահարկվում և թիրախավորվում է՝ հասարակության շրջանում անհիմն անհանգստություն և թյուրըմբռնումներ առաջացնելու նպատակով։

ԿԳՄՍ նախարարությունը հորդորում է քաղաքացիներին և մասնագիտական հանրույթին առաջնորդվել բացառապես պաշտոնական և հավաստի աղբյուրներով՝ չտրվելով մանիպուլյացիաներին։

Գերատեսչությունը նաև վստահեցնում է, որ շարունակելու է գործել բաց և թափանցիկ՝ տրամադրելով ամբողջական և ճշգրիտ տեղեկատվություն ոլորտում իրականացվող ծրագրերի վերաբերյալ։