Իրանից ցամաքային անցակետով երկու հայ է Հայաստան ժամանել

Սփյուռքի գլխավոր հանձնակատարի գրասենյակը հետևում է զարգացումներին

Իրանի հայ համայնքի հետ շուրջօրյա կապ պահպանելը դժվար է՝ ինտերնետի և հեռախոսակապի խափանումների պատճառով, սակայն ստացված վերջին տեղեկություններով՝ հայերի շրջանում տուժածներ կամ զոհեր չկան, տեղեկանում ենք սփյուռքի գլխավոր հանձնակատարի գրասենյակից։

«Սփյուռքի գործերի գլխավոր հանձնակատարի գրասենյակը հետևողականորեն աշխատում է Մերձավոր Արևելքում գտնվող բոլոր հայ համայնքների հետ՝ գործարկելով հնարավոր բոլոր միջոցները։ Օրեր առաջ գործարկել ենք թեժ գիծ, որին այսօրվա դրությամբ ստացվել է շուրջ 30 հեռախոսազանգ, հիմնականում՝ ԱՄԷ-ում գտնվող քաղաքացիներից, ավիաչվերթների վերաբերյալ։ Զանգեր եղել են նաև Իրանից, Բահրեյնից, Քաթարից, Քուվեյթից և Լիբանանից։

Ըստ հանձնակատարի գրասենյակի՝ կապը հնարավորինս պահում են նաև դեսպանության միջոցով. «Երեկ և այսօր երկու հայ է Իրանից ցամաքային անցակետով ժամանել Հայաստան։ Մեր տեղեկություններով՝ Իրանում հարվածները հասցվում են բացառապես ռազմական օբյեկտներին։ Հայերի շրջանում զոհերի կամ տուժածների մասին տեղեկատվություն չկա»,-ասացին՝ հավելելով, որ Իսրայելում հայերը հիմնականում տներում կամ ապաստարաններում են։ Քուվեյթում դպրոցները փակ են, մարդիկ հիմնականում տներում են։

Սփյուռքի գլխավոր հանձնակատարի գրասենյակը հետևում է զարգացումներին և ինտենսիվ աշխատում Մերձավոր Արևելքում գտնվող հայ համայնքների հետ։