Իրան-Հայաստան բարձրավոլտ երրորդ էլեկտրահաղորդման գծի շինարարության ավարտի ժամկետները, որի մեկնարկը տրվել էր դեռևս 16 տարի առաջ, կրկին հետաձգվել են։ ՀՀ տարածքային կառավարման և ենթակառուցվածքների նախարարության (ՏԿԵՆ) էներգետիկայի բաժնի պետ Հովհաննես Աբրահամյանը Sputnik Արմենիայի հետ զրույցում հայտնել է, որ 400 կՎ լարման էլեկտրահաղորդման գծի աշխատանքների դանդաղման հիմնական պատճառը Մերձավոր Արևելքում ստեղծված լարվածությունն է։
Աշխարհաքաղաքական ազդեցությունը և ներկա տեմպերը Ըստ նախարարության ներկայացուցչի՝ Իրանում և ողջ տարածաշրջանում տեղի ունեցող վերջին իրադարձությունների պատճառով իրանական գործընկերների մոտ առաջացել էին որոշակի խնդիրներ, ինչն անդրադարձել է ծրագրի ժամանակացույցի վրա։ Այդուհանդերձ, այս պահին իրավիճակը կայունանում է, և աշխատանքները մտել են ավելի ինտենսիվ փուլ։
«Աշխատանքները ցածր տեմպերով, բայց շարունակվում էին, իսկ հիմա ավելի ինտենսիվ են ընթանում։ Հենարանների և մալուխների անցկացման հետ կապված տարբեր աշխատանքներ դեռևս չեն ավարտվել, սակայն տրանսֆորմատորների տեղադրումը մոտ ապագայում կավարտվի։ Դրանցից մեկն արդեն Հայաստանում է, մյուսը մոտ ժամանակներս կներկրվի»,– մանրամասնել է Աբրահամյանը։
ՏԿԵՆ պաշտոնյան հրաժարվել է հստակ վերջնաժամկետ նշել՝ հաշվի առնելով տարածաշրջանային անկայունությունը, սակայն ընդգծել է, որ առանց աշխարհաքաղաքական ֆորսմաժորների ծրագիրը հնարավոր կլիներ ավարտել մինչև 2026 թվականի տարեվերջ։
Ծրագրի ռազմավարական նշանակությունը Այս պահին Հայաստանի և Իրանի միջև գործող «Գազ՝ էլեկտրաէներգիայի դիմաց» սվոփային գործարքն իրականացվում է 220 կՎ լարման «Ագարակ – Մեղրի» և «Նորադուզ – Ագարակ» գծերով։ Իրանական գազը Հայաստանում (հիմնականում՝ Հրազդանի ՋԷԿ-ում) վերամշակվում է էլեկտրաէներգիայի և հետ վերադարձվում Իրանին։
Կառուցվող 400 կՎ լարման նոր էլեկտրահաղորդման գիծն անհրաժեշտ է հետևյալ առանցքային նպատակների համար.
Երկու երկրների միջև էներգետիկ փոխհոսքերի ծավալների էական ավելացում,
Էներգահամակարգերի սինխրոն աշխատանքի ապահովում,
«Հյուսիս-Հարավ» էներգետիկ միջանցքի շրջանակներում տարանցիկ հնարավորությունների ընդլայնում։
