Ֆրանսիայում մոտ 175,000 մարդ դուրս է եկել փողոց՝ բողոքի ցույցի․ Փարիզի կենտրոնում ռեստորան է այրվել

Փարիզի կենտրոնում գտնվող ռեստորանում հրդեհ է բռնկվել «Ամեն ինչ կարգելափակենք» լայնածավալ բողոքի ակցիայի ժամանակ. դատախազությունը հետաքննություն է սկսել, գրում է Le Monde-ը։

Հրշեջները փորձել են մարել Փարիզի կենտրոնում՝ Շատելի հրապարակի մոտ գործող ռեստորանում բռնկված հրդեհը։

Շենքը հրդեհվել է, և հրշեջները աշխատել են հրդեհը մարելու ուղղությամբ, իսկ իրավապահ մարմինների աշխատակիցները տարհանել են մարդկանց հարակից տարածքից։

Ըստ հաղորդագրությունների՝ հրդեհը սկզբում բռնկվել է ռեստորանի ներսում, որից հետո այն կլանել է շենքի կանաչ ճակատը, որը նույնպես այրվել է։ Ոստիկանությունը սկզբում փորձել է մարել ռեստորանում բռնկված հրդեհը հրդեհաշիջման սարքերով, բայց ապարդյուն։ Հրշեջները ժամանել են մի քանի րոպե անց և արագորեն վերահսկողության տակ են վերցրել հրդեհը։

Բողոքի ակցիայի մասնակիցները վանկարկել են «Bravo la police!» և մեղադրել են ոստիկանությանը ռեստորանում արցունքաբեր գազի նռնակ նետելու մեջ, երբ ոստիկանությունը գրոհել է այն։

Փարիզի դատախազը հայտարարել է Շատելի հրապարակում հրդեհի հետաքննության մասին, որը կարող է կապված լինել «ոստիկանական միջամտության» հետ։

«Մեր ունեցած տեղեկություններով՝ դա կարող էր լինել ոստիկանության միջամտությանն առնչվող պատահական հրդեհ»,- հավելել է նա։

Ֆրանսիայի Ներքին գործերի նախարարության վերջին տվյալներով՝ ցուցարարների թիվը կազմել է 175 հազար։

Ընդհանուր առմամբ ձերբակալվել է 473 մարդ, նրանց թվում՝ 203-ը Փարիզում, իսկ 339-ը կալանավորվել են։

«Իրավիճակը հատկապես լարված է Ռենում, Նանտում և Փարիզում, որտեղ ոստիկանության հետ բախումներից հետո նախազգուշացումներ են տրվել»,- հավելել են Ներքին գործերի նախարարությունից։

Ցույցերը տեղի են ունենում քաղաքական ցնցումների ժամանակաշրջանում՝ խորհրդարանի կողմից վարչապետ Ֆրանսուա Բայրուի պաշտոնանկությունից երկու օր անց՝ երկրի աճող պարտքը զսպելու նրա ծրագրերի պատճառով։