Դեպի Եվրոպական միության երկրներ հայկական գյուղմթերքի արտահանման հեռանկարներն ու առկա խոչընդոտները եղել են ԱԺ մշտական հանձնաժողովների համատեղ նիստի քննարկման կենտրոնում: Խնդրին մանրամասն անդրադարձել է ՀՀ էկոնոմիկայի նախարար Գևորգ Պապոյանը՝ ներկայացնելով ոլորտում առկա ձեռքբերումներն ու լոգիստիկ մարտահրավերները:
Ինտենսիվ այգիների և ջերմոցների գործոնը
Նախարարն ընդգծել է, որ դեպի եվրոպական շուկա մուտք գործելու հնարավորությունը նախորդ տարիներին իրականացված հետևողական աշխատանքի և ներդրումների արդյունքն է:
«Իրականում մենք շատ մեծ աշխատանք ենք նախորդիվ արել. եթե մենք չունենայինք հարյուրավոր հեկտարներով պտուղ-բանջարեղենի ջերմոցներ և հազարավոր հեկտարներով ինտենսիվ այգիներ, այսօր ոչ մի բան էլ չէինք կարողանա արտահանել ԵՄ»,- նշել է Պապոյանը՝ հավելելով, որ այն արտադրողներին, որոնք դեռևս չեն համապատասխանում եվրոպական ստանդարտներին, պետությունը փորձելու է աջակցել:
Գնային մրցունակության վրա ազդող լոգիստիկ բարդությունները
Որպես եվրոպական ուղղությամբ արտահանման հիմնական արգելակող գործոն՝ գերատեսչության ղեկավարը նշել է աշխարհագրական և ենթակառուցվածքային սահմանափակումները: Լոգիստիկայի բարդությունն ու երկարությունը, փակ սահմանները, ծովի ելքի բացակայությունն ու տրանզիտային ժամանակի տևողությունը ուղղակիորեն ազդում են հայկական ապրանքի վերջնական գնի և շուկայական մրցունակության վրա:
Այնուամենայնիվ, նախարարը վստահեցրել է, որ որակական առումով հայկական ապրանքը որևէ խնդիր չունի. «Վաղուց անցել են այն ժամանակները, որ ասում էին, թե մեր ապրանքները ով կառնի, մերը որակով չէ»:
ԵՄ կանոնակարգերին համապատասխանության աստիճանը
Արձագանքելով պատգամավորների հարցին, թե ներկայումս արտահանվող ընդհանուր ծավալի որ մասն է համապատասխանում ԵՄ խիստ կանոնակարգերին, Գևորգ Պապոյանը տվել է հստակ ձևակերպում. Հայաստանի սահմանը հատող և եվրոպական որևէ երկիր մուտք գործած ցանկացած ապրանք 100%-ով համապատասխանում է սահմանված նորմերին, քանի որ անհամապատասխանության չնչին դեպքում ապրանքն անմիջապես հետ է ուղարկվում սահմանից:
