Առողջապահական ապահովագրության համակարգում անդամներից միայն 18.3%-ն է ապահովագրավճար վճարում

ՀՀ առողջապահության նախարար Անահիտ Ավանեսյանը հայտարարել է, որ առողջության համընդհանուր ապահովագրության համակարգում ընդգրկված քաղաքացիների ճնշող մեծամասնությունը գտնվում է պետական հոգածության ներքո։

Նախարարի խոսքով՝ այս պահին համակարգում ընդգրկված է 1 մլն 371 հազար 181 անձ։

«Այդ թվի 39.9 տոկոսը մինչև 18 տարեկաններն են, 32.5 տոկոսը՝ 65 տարեկան և ավելի բարձր տարիքի քաղաքացիները։ 200 հազար դրամից ավելի աշխատավարձ ստացող խումբը կազմում է 18.3 տոկոս, իսկ սոցիալական աջակցության խմբերը՝ 9.3 տոկոս», – նշել է Ավանեսյանը։

Նրա խոսքով՝ սա նշանակում է, որ ապահովագրավճար վճարող քաղաքացիները կազմում են ընդհանուր թվի միայն 18.3 տոկոսը, մինչդեռ մնացած քաղաքացիները ապահովագրվում են պետական բյուջեի միջոցներով։

«Սա կարևոր ցուցանիշ է, որը ցույց է տալիս, թե պետությունն ինչ մեծ ծավալով միջոցներ է ուղղում քաղաքացիների առողջապահական ծառայությունների ապահովմանը», – ընդգծել է առողջապահության նախարարը։