ՀՀ-ում ներգաղթը գերազանցել է արտագաղթին

ՆԳ նախարար Արփինե Սարգսյանը ԱԺ-ում ներկայացրել է 2025 թվականի արդյունքները՝ ընդգծելով մի շարք կարևոր ցուցանիշներ։

Նրա խոսքով՝ անկախությունից ի վեր առաջին անգամ 2025 թվականին գրանցվել է ՀՀ քաղաքացիների միգրացիոն դրական սալդո, ինչը նշանակում է, որ ներգաղթը գերազանցել է արտագաղթին։

Նախարարը նշել է, որ Հայաստանը միակ երկիրն է, որի հետ ԵՄ-ն ակտիվ երկխոսություն է վարում վիզաների ազատականացման թեմայով, և ռեկորդային արագությամբ ստացել է գործողությունների ծրագիրը։

Նշվել է նաև, որ ներդրվում է ԵՄ նոր ստանդարտի կենսաչափական համակարգ։

ՆԳՆ-ի հանրային ծառայությունների ոլորտում իրականացվել են լայնածավալ թվայնացման աշխատանքներ․ բոլոր ծառայությունների հերթագրման համակարգերը դարձել են ամբողջությամբ թվայնացված։

Անվտանգության ցուցանիշներով Հայաստանը 193 երկրների շարքում զբաղեցնում է 13-րդ տեղը՝ World Travel Index-ի տվյալներով։

Հանցագործությունների թիվը 2025 թվականին նվազել է 3.2%-ով՝ 2024 թվականի համեմատ։

Ճանապարհային անվտանգության ոլորտում ևս դրական արդյունքներ են արձանագրվել․ երկու տարվա ընթացքում խնայվել է 95 կյանք։

Աճել է նաև ոստիկանության նկատմամբ հանրային վստահությունը՝ հասնելով 61%-ի։

Չնայած արտակարգ դեպքերի թվի աճին՝ դրանց հետևանքով տուժածների թիվը նվազել է 1601-ով, իսկ զոհերինը՝ 59-ով։

Նախարարը ընդգծել է, որ այս արդյունքները պայմանավորված են իրականացված համակարգային բարեփոխումներով։