Հայաստանը կօգտվի կակաոյի և հումքի անմաքս ներմուծման քվոտաներից

Կարգավորումը նպատակ ունի ապահովել հումքի հասանելիությունը արտադրողների համար

ՀՀ կառավարությունը ապրիլի 2-ի նիստում կիրառության մեջ է դրել Եվրասիական միջկառավարական խորհրդի որոշումները՝ մի շարք ապրանքների անմաքս ներմուծման վերաբերյալ։

Ըստ որոշման՝ Հայաստանը մինչև 2027 թվականի ապրիլի 30-ը կօգտվի կակաոյի մածուկի և կակաոյի յուղի անմաքս ներմուծման քվոտաներից՝ համապատասխանաբար 300 և 200 տոննա ծավալով։

Սահմանված քվոտան գերազանցելու դեպքում ներմուծվող ապրանքների համար կկիրառվեն մաքսատուրքեր՝ 3-5 տոկոսի չափով։

Բացի այդ, մինչև 2028 թվականի ավարտը թույլատրվում է տեղական արտադրության կարիքների համար տեքստիլի և կաշվի մշակման նյութերի անմաքս ներմուծում։

Կարգավորումը նպատակ ունի ապահովել հումքի հասանելիությունը արտադրողների համար և աջակցել տեղական արտադրության զարգացմանը՝ նվազեցնելով ներմուծման ծախսերը։