ԵԱՏՄ-ն և Ինդոնեզիան ստորագրել են ազատ առևտրի գոտու ստեղծման մասին համաձայնագիր

Ինդոնեզիան նույնպես կկարողանա ավելացնել մատակարարումները։

ԵԱՏՄ երկրներն ու Ինդոնեզիան ստորագրել են ազատ առևտրի գոտու մասին համաձայնագիր: Ակնկալվում է, որ այն հնարավորություն կտա զրոյացնել միության անդամ պետությունների ապրանքային արտահանման 94%-ի մաքսատուրքերը դեպի ասիական հանրապետություն։

Փաստաթղթի ստորագրման արարողությունը տեղի է ունեցել Սանկտ Պետերբուրգում անցկացված Եվրասիական տնտեսական բարձրագույն խորհրդի նիստի շրջանակում։

Սա ԵԱՏՄ երկրների կողմից այս տարի կնքված ԱԱԳ-ի արդեն երրորդ համաձայնագիրն է․ ավելի վաղ՝ ամռանը, ստորագրվել էին ազատ առևտրի համաձայնագիր ԱՄԷ-ի հետ և ժամանակավոր առևտրային համաձայնագիր Մոնղոլիայի հետ։

Ինդոնեզիայի հետ ԱԱԳ-ի շուրջ բանակցությունների մեկնարկի մասին որոշումը ԵԱՏՄ երկրները ընդունել էին 2022 թվականին։ 2023-2024 թվականներին անցկացվել են բանակցությունների մի քանի փուլեր։ Ընթացիկ տարում կողմերը ավարտել են պայմանագրի պայմանների համաձայնեցումը՝ կարգավորող սահմանափակումների վերացման, ինչպես նաև արտահանման և ներմուծման առանձին դիրքերի համար մաքսատուրքերի նվազեցման վերաբերյալ փոխադարձ պարտավորությունների ժամանակացույցի մասով։

Ինչպես ավելի վաղ հայտնել էր Եվրասիական տնտեսական հանձնաժողովի առևտրի նախարար Անդրեյ Սլեպնևը, մաքսատուրքերի զրոյացումը կվերաբերի ԵԱՏՄ-ի և Ինդոնեզիայի միջև շուրջ 3 մլրդ դոլարի փոխադարձ առևտրին, այդ թվում՝ ԵԱՏՄ-ից արտահանվող ապրանքների 94%-ին։

«Սպասում ենք, որ համաձայնագրի ուժի մեջ մտնելուց հետո առաջիկա 3-5 տարիների ընթացքում մեր երկրների միջև ապրանքաշրջանառությունը կկրկնապատկվի», – նշել էր նախարարը հոկտեմբերին։

ԵՏՀ-ի առևտրային բլոկի հաղորդմամբ՝ առևտրային ռեժիմի լիբերալացման արդյունքում Ինդոնեզիայի կողմից ԵԱՏՄ ապրանքների նկատմամբ կիրառվող միջին մաքսատուրքը կնվազի հինգ անգամ՝ 10.2%-ից մինչև 2%։

Արտոնյալ մուտք կտրամադրվի ԵԱՏՄ հիմնական գյուղատնտեսական ապրանքներին՝ հացահատիկային մշակաբույսեր (ցորեն, գարի, տարեկանի, վարսակ), համեմունքներ, ալյուրի առանձին տեսակներ, հացաբուլկեղեն, ձուկ և խոշոր եղջերավոր անասունների միս, կաթնամթերք՝ ներառյալ չոր կաթը և պանիրը, հանքային ջրեր և այլն։ Արդյունաբերական հատվածում զիջումներ են նախատեսված մետալուրգիական արտադրանքի, նավթամթերքների (ներառյալ թեթև և այլ դիստիլյատներ), ածխի և անտրացիտի, պարարտանյութերի, պոլիմերների, անտառարդյունաբերական համալիրի արտադրանքի (ֆաներա, կահույք և այլն), շինարարական տեխնիկայի և տարբեր տեսակի սարքավորումների համար։

Ինդոնեզիան նույնպես կկարողանա ավելացնել մատակարարումները «սպառողական ապրանքների լայն անվանացանկով», այդ թվում՝ ավտոմասեր, կենցաղային տեխնիկա, հագուստի և կոշիկի առանձին տեսակներ։