Ադրբեջանական բենզինը շատ արագ սպառվում է․ Էկոնոմիկայի նախարար

Հետևությունն այն է, որ պետք է ադրբեջանական բենզին շատ բերենք, որ շատ լինի էժան բենզին մեր ժողովրդի համար։

Ադրբեջանական բենզինը հենց 430 դրամով գալիս է, շատ արագ սպառվում է: Երբ ադրբեջանական բենզինը վերջանում է, մյուս բենզինը թանկանում է: Այդ մասին խորհրդարանական ճեպազրույցի ժամանակ ասաց էկոնոմիկայի նախարար Գևորգ Պապոյանը՝ պատասխանելով հարցին, թե ինչու է բենզինի գինը տատանվում:

«Հետևությունն այն է, որ պետք է ադրբեջանական բենզին շատ բերենք, որ շատ լինի էժան բենզին մեր ժողովրդի համար… Այսինքն՝ ինչքան շատ բերենք, այդքան գները կիջնեն ներքև: Եվ դա շատ տրամաբանական է»,- ասաց նա:

Պապոյանը նկատեց՝ մինչև բենզինի ներկրումը Հայաստան, ռեգուլյար բենզինը Հայաստանում վաճառվում էր 500-520 դրամով: Եթե հիմա 445 դրամ է, 520 դրամի համեմատությամբ տարբերությունը 75 դրամ է, հետևաբար ամեն մի լիտրում քաղաքացին 75 դրամ է խնայում, ամեն 10 լիտրում՝ 750 դրամ:

«Այդ փողը մեր երկրից դուրս էր գնում, հիմա մնում է մեր երկրի ներսում: Եթե քաղաքացին 10 լիտր բենզին է լցնում, և մոտ 800 դրամ խնայում է, նշանակում է 800 դրամ գրպանից քիչ է գնում»,- ասաց նա:

Պապոյանը նաև հիշեցրեց, որ հայկական և ադրբեջանական կողմերը, բենզինից բացի, նաև այլ ապրանքների ցանկերով են փոխանակվել, որոնք կարող են ներկրել երկու երկրները: Բայց այդ գործընթացը դեռ ընթացքի մեջ է:

«Ես վստահ եմ՝ առևտուր լինելու է»,- ասաց նա: