Հայաստանը ստանում է Ադրբեջանից բենզինի երկրորդ խմբաքանակը

Նախնական գնահատականներով ներմուծվող վառելիքի գինը կարող է լինել շուկայականից մոտ 80 դրամով ցածր։

Հայաստանի էկոնոմիկայի նախարարությունը հաստատել է ադրբեջանական լրատվամիջոցների տարածած տեղեկությունը՝ Ադրբեջանից Հայաստան նավթամթերքի երկրորդ խմբաքանակի ներմուծման վերաբերյալ։

Էկոնոմիկայի նախարար Գևորգ Պապոյանը հայտնել է, որ այս անգամ Հայաստան է ներմուծվում նավթամթերքի ավելի լայն տեսականի՝ ներառյալ պրեմիում և ռեգուլյար բենզին, ինչպես նաև դիզելվառելիք։ Նախնական գնահատականներով ներմուծվող վառելիքի գինը կարող է լինել շուկայականից մոտ 80 դրամով ցածր։

Ադրբեջանական կողմի փոխանցմամբ՝ հերթական խմբաքանակի շրջանակում նախատեսվում է Հայաստան տեղափոխել շուրջ 1000 տոննա A92 տեսակի բենզին, 1000 տոննա դիզելվառելիք և 1800 տոննա A95 տեսակի բենզին։

Ադրբեջանից Հայաստան նավթամթերքի առաջին ներմուծումը իրականացվել է 2025 թվականի դեկտեմբերին։ Դեկտեմբերի 19-ին Վրաստանի տարածքով Հայաստան է ժամանել 22 վագոնից բաղկացած գնացք՝ բեռնված 1218 տոննա A95 տեսակի բենզինով, որը հասել է «Այրում» երկաթուղային կայարան։

Ներմուծման շարունակականությունը դիտարկվում է որպես վառելիքի մատակարարման աղբյուրների դիվերսիֆիկացման գործընթացի մաս։