Վատիկան կատարած պաշտոնական այցելության առաջին օրը՝ մայիսի 18-ին, Ն.Ս.Օ.Տ.Տ. Արամ Ա. Մեծի Տանն Կիլիկիո Կաթողիկոսը, իր պատվիրակության ընկերակցությամբ, հանդիպում է ունեցել Վատիկանի պետքարտուղար (վարչապետ), կարդինալ Պիետրո Պարոլինի հետ: Կարդինալը Վատիկանի վարչական, քաղաքական և արտաքին հարաբերությունների պատասխանատուն է և համարվում է Սուրբ Աթոռի երկրորդ դեմքը՝ Պապից հետո: Այս մասին հայտնում է Կիլիկիո կաթողիկոսության մամլո դիվանը։
Լիբանանի կացությունը և տարածաշրջանային անվտանգությունը
Հանդիպման ընթացքում Նորին Սրբությունն անդրադարձել է Մերձավոր Արևելքի, մասնավորապես՝ Լիբանանի ներկայիս իրավիճակին.
Ներքաղաքական իրավիճակ. Կաթողիկոսը բարձր է գնահատել Լիբանանի նախագահի և վարչապետի գլխավորությամբ կառավարության հետևողական աշխատանքը։
Իրավիճակը հարավային Լիբանանում. Արամ Ա.-ն ընդգծել է, որ Իսրայելը պետք է իր զինված ուժերը հետ քաշի հարավային Լիբանանից: Ըստ հայրապետի՝ երկրի բանակը պետք է ստանձնի ընդհանուր անվտանգության ապահովումը, իսկ Լիբանանի պետությունը պետք է վերահաստատի իր գերիշխանությունը բոլոր շրջաններում:
Ներքին միասնականություն. Շեշտվել է Լիբանանի բոլոր համայնքների միջև ներքին միասնականության ամրապնդման հրամայականը և դրվատվել Վատիկանի ցուցաբերած զորակցությունը։
Միջին Արևելքի քրիստոնեությունը և Հայոց Ցեղասպանության ճանաչումը
Արամ Ա. Կաթողիկոսը մտահոգություն է հայտնել Միջին Արևելքում քրիստոնյա համայնքների դիմագրաված մարտահրավերների, մասնավորապես՝ քրիստոնյաների արտագաղթի տեմպերի վերաբերյալ՝ կարևորելով շրջանի եկեղեցիների դերը այս գործընթացի կասեցման հարցում:
Միևնույն ժամանակ, Վեհափառ Հայրապետը բարձր է գնահատել Հայոց Ցեղասպանության ճանաչման և հայ ժողովրդի իրավունքների վերահաստատման գծով Սուրբ Աթոռի շարունակական նեցուկը:
Արցախի հիմնախնդիրը և գերիների ազատ արձակումը
Խոսելով Լեռնային Ղարաբաղի (Արցախի) մասին՝ Կաթողիկոսը ձևակերպել է հայկական կողմի համար սկզբունքային երեք առաջնահերթություն, որոնց ուղղությամբ ակնկալվում է Վատիկանի աջակցությունը.
Արցախի ժողովրդի վերադարձի և նրանց իրավունքների վերահաստատման ապահովում,
Հայկական եկեղեցիների ու պատմական մշակութային կոթողների պաշտպանություն,
Բաքվում կալանավորված Արցախի ռազմաքաղաքական ղեկավարության շուտափույթ ազատ արձակում:
Կարդինալ Պարոլինը, իր հերթին, ներկայացրել է Արցախի և հատկապես բանտարկյալների ազատ արձակման ուղղությամբ Վատիկանի կողմից իրականացվող դիվանագիտական նախաձեռնությունների ընթացքը:
Գործնական առաջարկներ և պաշտոնական արարողակարգ
Վատիկանի պետքարտուղարը ողջունել է Արամ Ա. Կաթողիկոսի առաջարկը՝ մոտ ապագայում Վատիկանում կազմակերպել հատուկ խորհրդակցական հանդիպումներ Լիբանանի, ինչպես նաև Միջին Արևելքի քրիստոնյա հոգևոր պետերի մասնակցությամբ։
Հանդիպման ավարտին կողմերը փոխանակվել են հուշանվերներով։ Վեհափառ Հայրապետը կարդինալին է նվիրել Աստվածամոր պատկերով հուշանվեր և Արցախի հայկական եկեղեցիների պատկերներն ամփոփող երկհատորյա հրատարակություն: Շուրջ մեկ ժամ տևած պաշտոնական հանդիպումից հետո Արամ Ա.-ն և կարդինալ Պարոլինն ունեցել են նաև առանձնազրույց՝ փոխադարձ հետաքրքրություն ներկայացնող մի շարք զգայուն խնդիրների շուրջ:
