Մի շարք տուրիստականների հակամրցակցային գործողություններից պետությանը պատճառվել է 53 միլիոն դրամի վնաս

Քրեական վարույթի նյութերը փոխանցել է դատարան։

Դատախազը 2025 թվականի դեկտեմբերի 26-ին հաստատված մեղադրական եզրակացությամբ իրավասու դատարան է հանձնել տուրիստական ոլորտում հակամրցակցային գործունեության համար մեղադրվող 7 ընկերությունների տնօրենների վերաբերյալ քրեական վարույթի նյութերը։ Այդ մասին հայտնում է ՀՀ գլխավոր դատախազությունը։

Քննչական կոմիտեում քննված քրեական վարույթի շրջանակում պարզվել է, որ Հայաստանի Հանրապետությունում տուրիստական գործունեություն իրականացնող 7 ընկերությունների ղեկավարներ պայմանավորվել են հակամրցակցային գործողությունների միջոցով շուկայից դուրս մղել մեկ այլ տուրիստական ընկերության։

Մասնավորապես, նշված ընկերությունների ղեկավարները հակամրցակցային համաձայնության արդյունքում հրաժարվել են տվյալ ընկերությանը ավիատոմսեր վաճառելուց, ինչպես նաև դադարեցրել են համագործակցությունը այդ ընկերության գործընկերների հետ։ Արդյունքում վերջինս հայտնվել է մրցակցության սահմանափակման պայմաններում և չի կարողացել պատշաճ իրականացնել իր գործունեությունը։

Քրեական վարույթի նյութերով հաստատվել է, որ նշված իրավիճակի հետևանքով ընկերությունը Եգիպտոսի Հուրգադա քաղաք տեղափոխված շուրջ 130 հայ զբոսաշրջիկների համար չի կարողացել կազմակերպել վերադարձը Հայաստանի Հանրապետություն։

Խնդրի լուծման նպատակով ՀՀ կառավարության 2019 թվականի հուլիսի 26-ի թիվ 933-Ն որոշմամբ ՀՀ կառավարության պահուստային ֆոնդից ՀՀ արտաքին գործերի նախարարությանը հատկացվել է 47 մլն 198 հազար դրամ՝ քաղաքացիների Հայաստան տեղափոխման ծառայությունների իրականացման համար։ Այնուհետև 2019 թվականի օգոստոսի 1-ի թիվ 983-Ն որոշմամբ նույն նպատակով Տարածքային կառավարման և ենթակառուցվածքների նախարարությանը հատկացվել է ևս 5 մլն 838 հազար դրամ։

Դատախազը 2025 թվականի դեկտեմբերի 16-ին հանրային քրեական հետապնդում է հարուցել տուրիստական 7 ընկերությունների տնօրենների նկատմամբ, իսկ դեկտեմբերի 26-ին քրեական վարույթի նյութերը փոխանցել է դատարան։

Միաժամանակ, պետությանը պատճառված վնասի վերականգնման նպատակով ՀՀ ֆինանսների նախարարությունը դատարան է ներկայացրել քաղաքացիական հայց։ Դատարանի 2025 թվականի դեկտեմբերի 25-ի վճռով սահմանվել է ՀՀ պետական բյուջեի օգտին 53 մլն դրամ բռնագանձում՝ որպես պարտավորության գումար։