Հունգարիան և Լեհաստանը չեն աջակցել Եվրամիությունում (ԵՄ) գազի սպառման կրճատման ծրագրին։ Այս մասին հայտնում է РИА Новости-ն ՝ հղում անելով Եվրախորհրդի փաստաթղթին։ «Բոլոր պատվիրակությունները կողմ են քվեարկել գազի պահանջարկի նվազեցման համակարգված միջոցառումների մասին Խորհրդի կանոնակարգի ընդունմանը, բացառությամբ Հունգարիայի և Լեհաստանի պատվիրակությունների, որոնք դեմ են քվեարկել»,- ասվում է փաստաթղթում։ Նշվում է, որ ձեռք է բերվել ծրագրի ընդունման համար անհրաժեշտ որակյալ մեծամասնությունը։ Ավելի վաղ հաղորդվել էր, որ Եվրամիության երկրները համաձայնության են եկել գալիք ձմռանը գազի կամավոր խնայողության պլանի շուրջ։ «ԵՄ-ի էներգետիկ անվտանգությունը բարձրացնելու նպատակով խորհուրդն այսօր համաձայնեցրել է մի փաստաթուղթ, որը նախատեսում է այս ձմռանը բնական գազի պահանջարկի կամավոր կրճատում 15 տոկոսով», - ասվում է մամուլի հաղորդագրության մեջ։