Արդյո՞ք Ուկրաինայում տեղի ունեցող իրադարձությունները համաշխարհային սովի պատճառ կարող են դառնալ Ուկրաինական իրադարձությունների պատճառով ամբողջ աշխարհում պարենային ապրանքների գները կարող են աճել 22%-ով, ըստ ՄԱԿ-ի։ ՄԱԿ-ի Պարենի և գյուղատնտեսության կազմակերպության (FAO) զեկույցի համաձայն՝ Ուկրաինայում տեղի ունեցողի երկարաժամկետ ազդեցությունը պարենային գլոբալ համակարգի վրա կզգացվի մինչև 2023 թվականը և, հնարավոր է, ավելի երկար: Ըստ ՄԱԿ-ի աշխարհում սպառված կալորիաների մեկ տասներորդ մասը կազմում են Ուկրաինան և Ռուսաստանը։ Փետրվարի վերջից, երբ Ռուսաստանը «հատուկ գործողություն»  սկսեց Ուկրաինայի տարածքում, բնականոն առևտրի գործընթացը խաթարվել է: Human Rights Watch-ը երկուշաբթի օրը՝ մարտի 21-ին, հայտարարեց, որ աշխարհի կառավարությունները պետք է ամեն ինչ անեն, որպեսզի ռուս-ուկրաինական հակամարտությունը չսրի Մերձավոր Արևելքում և Հյուսիսային Աֆրիկայում պարենային ճգնաժամը։ Կազմակերպությունը զգուշացնում է , որ եթե կոնկրետ քայլեր չձեռնարկվեն սննդի մատակարարման և հասանելիության խնդիրները լուծելու համար, Ուկրաինայում հակամարտությունը կարող է հանգեցնել պարենային ճգնաժամի խորացմանը, հատկապես Մերձավոր Արևելքում և Հյուսիսային Աֆրիկայում: Մարդու իրավունքների միջազգային իրավունքի համաձայն՝ յուրաքանչյուր ոք իրավունք ունի օգտվելու բավարար քանակությամբ սննդից՝ առողջ և ակտիվ կյանք վարելու համար: Հենց այս իրավունքներն այժմ կարող են խախտվել, զգուշացնում է կազմակերպությունը։ Պարենի համաշխարհային ծրագրի ղեկավար Դեյվիդ Բիսլին կոչ է արել ուշադրություն դարձնել այն փաստին, որ Ուկրաինայի շուրջ ստեղծված իրավիճակը վնասում է ոչ միայն Ուկրաինային. «Խնդրում եմ, մի անտեսեք Սահելը, մի անտեսեք Սիրիան, Հորդանանը և Լիբանանը: Եթե ​​մոռանանք դրանց մասին, հետեւանքները աղետալի կլինեն։ Առանց պարենային ապահովության խաղաղություն չկա»։ Սննդի իրավունքի հարցերով ՄԱԿ-ի հատուկ զեկուցող Մայքլ Ֆախրին «անխուսափելի» է անվանել առաջիկա սովերն ամբողջ աշխարհում։ Սննդամթերքի պակասի խնդիրը, նրա խոսքով, աճում է վերջին երեք տարիներին, և իրավիճակը Ուկրաինայում սրում է այն։ Նա նաև զգուշացրել է, որ Ռուսաստանի բնակչության մի մասը նույնպես սովի վտանգի տակ է բոլոր քաղաքացիների դեմ ուղղված պատժամիջոցների պատճառով, այլ ոչ թե անհատների կամ բիզնեսի։