Հայաստանին հասանելի է դարձել ԱՄՀ-ի $24.5 մլն ծավալով 18.4 մլն փոխառելիության իրավունքը Արժույթի միջազգային հիմնադրամի (ԱՄՀ) գործադիր խորհուրդը հաստաստել է ընթացիկ Պահուստային ծրագրի առաջին վերանայումը, որով Հայաստանի համար հասանելի է դարձել շուրջ $24.5 միլիոն ծավալով 18.4 միլիոն հատուկ փոխառելիության իրավունք,- գրում է banks.am-ը։ ԱՄՀ ներկայացուցիչների գնահատմամբ՝ ծրագիրն ընդհանուր առմամբ գտնվում է կայուն իրականացման փուլում, վերանայման պահի դրությամբ հարկաբյուջետային եւ դրամավարկային քանակական ցուցանիշների թիրախները պահպանվել են, եւ լավ առաջընթաց է գրանցվել կառուցվածքային բարեփոխումների իրագործման ուղղությամբ: ՀՀ ֆինանսների նախարարությունից հայտնել են, որ ԱՄՀ փորձագետների կողմից բարձր է գնահատվել Հայաստանի 2022թ. տնտեսական կատարողականը՝ առանձնացնելով երկնիշ (12.6%) տնտեսական աճը՝ պայմանավորված սպառման եւ արտաքին պահանջարկի բարձր մակարդակով, ինչպես նաեւ կապիտալի եւ միգրանտների մեծ հոսքերով: «Կարեւորվել է նաեւ հարկաբյուջետային դիրքի բարելավումը. բյուջեի պակասուրդը նվազել է մինչեւ 2.1%, իսկ Կառավարության պարտք/ՀՆԱ հարաբերակցությանը մակարդակը՝ 14%-ային կետով՝ մինչեւ 46.7%, ինչը պայմանավորված էր պակասուրդի կրճատմամբ, անվանական բարձր տնտեսական աճով եւ ՀՀ դրամի արժեւորմամբ։ Հայաստանի՝ 2023թ. տնտեսական հեռանկարները ԱՄՀ-ի կողմից եւս դրական են գնահատվել՝ չնայած գլոբալ ու տարածաշրջանային ռիսկերի առկայությանը»,- ասված է հաղորդագրությունում: Ակնկալվում է, որ ՀՆԱ-ի աճի տեմպը կդանդաղի, սակայն սպառման եւ ներդրումների բարձր մակարդակի պարագայում կպահպանվի 5.5%-ի մակարդակում: Ակնկալվում է նաեւ, որ գնաճը կկայունանա եւ կպահպանվի ԿԲ թիրախի սահմաններում: Նշվում է, որ Պահուստային ծրագիրն ունի կանխարգելիչ բնույթ եւ միտված է՝ ապահովելու կառուցվածքային բարեփոխումների իրականացման շարունակականությունը, աջակցելու մակրոտնտեսական, ֆինանսական եւ հարկաբյուջետային կայունության պահպանմանը: