Գերմանիան մոտ 900 միլիոն եվրո կհատկացնի աշխարհում սովի դեմ պայքարին Գերմանիայի կառավարությունը որոշել է 880 մլն եվրո հատկացնել աշխարհում սովի դեմ պայքարելու համար, Funke մեդիա խմբին ասել է Գերմանիայի տնտեսական համագործակցության և զարգացման նախարար Սվենյա Շուլցեն,- գրում է Die Zeit-ը։ Սա երկու անգամ ավելի է, քան նախկինում խոստացել էր կանցլեր Օլաֆ Շոլցը։ Մարտին նա հայտարարել էր, որ Գերմանիան կուղարկի 430 միլիոն եվրո, որոնց մի մասը կուղղվի ՄԱԿ-ի պարենային ծրագրին: Այնուհետև նշել էր, որ Ուկրաինայում ռուսական ռազմական գործողությունը «դրամատիկ հետևանքներ» կունենա պարենի համաշխարհային մատակարարումների վրա և կոչ արել անել հնարավոր ամեն ինչ ՝ Աֆրիկայի և Մերձավոր Արևելքի որոշ երկրներում սովը կանխելու համար։ Գերմանիայի իշխանությունները որոշել են ավելացնել ֆինանսական օգնության չափը հունիսին Բավարիայում G7-ի գագաթնաժողովից հետո։ Միջոցները կօգտագործվեն Թունիսին և Եգիպտոսին աջակցելու համար, որոնք մեծապես կախված են Ռուսաստանից և Ուկրաինայից հացահատիկի մատակարարումներից, ինչպես նաև երաշտից տուժած Եթովպիայից, Սուդանից և Քենիայից: Աջակցություն կտրամադրվի նաև կլիմայի փոփոխության և զինված հակամարտությունների հետևանքները զգացած պետություններին, մասնավորապես ՝ Մերձավոր Արևելքի երկրներին։