Ավստրիայում տարեկան գնաճը հասել է իր ամենաբարձր մակարդակին

Հունիսին Ավստրիայում տարեկան գնաճը ամենաբարձրն է եղել 1975 թվականի սեպտեմբերից ի վեր և կազմել է 8,7%: Այս մասին իր կայքում հաղորդագրություն է հրապարակել Ավստրիայի վիճակագրական դաշնային բյուրոյի մամուլի ծառայությունը։ «8,7 տոկոս աճով սպառողական գները հասել են վերջին 47 տարվա գնաճի ամենաբարձր մակարդակին։ Վերջին անգամ Ավստրիայում նման բարձր գնաճ ենք տեսել 1975 թվականի սեպտեմբերին»,- ասել է «Statistik Austria»-ի գործադիր տնօրեն Թոբիաս Թոմասը: Ինչպես նշել են վիճակագրական ծառայությունում, նախորդ ամսվա համեմատ սպառողական գների աճը կազմել է 1,4%։ Մայիսի վերջին գնաճը ամենաբարձրն էր 1976 թվականի ապրիլից ի վեր ՝ հասնելով 7,7% մակարդակի։ Ըստ Թոմասի ՝ վառելիքի, սննդամթերքի, կենցաղային էլեկտրաէներգիայի և ռեստորանների բարձր գները նպաստել են գնաճի բարձրացմանը։ Նա նշեց, որ թանկացումները հատկապես նկատելի են շաբաթական գնումների ժամանակ։ Վառելիքից, սննդամթերքից և ծառայություններից բաղկացած մինի զամբյուղի գինը տարեկան կտրվածքով թանկացել է 18,8%-ով։ Ավելի վաղ ՝ հուլիսի 19-ին, հաղորդվել էր, որ եվրոգոտու երկրների շարքում տարեկան գնաճի ամենաբարձր ցուցանիշը գրանցվել է Էստոնիայում։