Անցնող շաբաթվա այլ կարևոր իրադարձությունները ֆինանսական շուկաների համար

ՌԴ կենտրոնական բանկը վերաֆինանսավորման տոկոսադրույքը 19%-ից բարձրացրել է մինչև 21%՝ հասցնելով պատմական առավելագույն մակարդակին։ Կենտրոնական բանկից հայտնել են, որ պատրաստ են քաղաքականության հետագա խստացման։ ԱՄՆ առանձնատների վաճառքների քանակը սեպտեմբերին հասել է վերջին մեկուկես տարիների առավելագույն մակարդակին՝ պայմանավորված հիփոթեքային վարկերի տոկոսադրույքների նվազման ֆոնին տների նկատմամբ պահանջարկի աճով։ Փողերի լվացման դեմ պայքարի ֆինանսական գործողությունների խումբը (FATF) հոկտեմբերի 22-ին կայացած նիստին կրկին Ռուսաստանին չի ներառել «սև ցուցակ»-ում։ Խմբի անդամներն այդ հարցում ընդհանուր համաձայնության չեն եկել։ ԱՄՆ հիփոթեքային վարկերի տոկոսադրույքներն աճել են չորրորդ շաբաթն անընդմեջ՝ հասնելով 6.54%-ի, ինչը ենթադրում է, որ չնայած ԴՊՀ-ի կողմից տոկոսադրույքների կրճատմանը, անշարժ գույքի շուկան դեռևս որոշ ժամանակ կշարունակի դանդաղել։ Tesla-ն հաջորդ տարվա համար վաճառքի ծավալների 20-30% աճ է կանխատեսել, իսկ այս տարվա 3-րդ եռամսյակի արդյունքներով ընկերության շահույթն աճել է 12%-ով։ Դրական նորությունների ֆոնին ընկերության բաժնետոմսերի գինը հաշված ժամերի ընթացքում աճել է 2%-ով։ finarm.am