WhatsApp-ով ուղարկված հաղորդագրությունները հնարավոր կլինի խմբագրել․ գործածվել է նոր թարմացումը WhatsApp-ն արդեն ստացել է երկար սպասված ֆունկցիան, որը թույլ է տալիս խմբագրել արդեն ուղարկված հաղորդագրությունները։ Այնուամենայնիվ, դա կարելի է անել հաղորդագրությունն ուղարկելու պահից 15 րոպեի ընթացքում,- գրում է News.am Tech-ը։ Առաջիկա շաբաթների ընթացքում թարմացումը հասանելի կլինի WhatsApp-ի 2 միլիարդ օգտատերերի։
 «Ուրախ ենք ձեզ ավելի շատ վերահսկողություն տրամադրել ձեր զրույցների նկատմամբ՝ ուղղագրական պարզ սխալը շտկելուց մինչև հաղորդագրությանը լրացուցիչ համատեքստ ավելացնելը»,- ասվում է մեսենջերի տարածած հայտարարությունում։
Ինչպես տեղեկացնում է BBC-ն, արդեն ուղարկված հաղորդագրությունը խմբագրելու համար հարկավոր է պարզապես սեղմել դրա վրա և պահել, իսկ հայտնվող մենյուից ընտրել «Խմբագրել» հրահանգը: Հաղորդագրությունն ստացողը կտեսնի, որ այն խմբագրվել է, սակայն չի կարողանա տեսնել խմբագրման ողջ պատմությունը: Կատարված փոփոխությունները, ինչպես նաև բոլոր անձնական հաղորդագրությունները, մեդիաֆայլերը և զանգերը պաշտպանված են ծայրից ծայր կոդավորմամբ։