Հայաստանի ֆոնդային բորսան Global Banking & Finance Awards-ի կողմից արժանացել է երկու հեղինակավոր մրցանակների Հայաստանի ֆոնդային բորսան (AMX) հպարտությամբ հայտարարում է, որ ճանաչվել է «Լավագույն ֆոնդային բորսա Հարավային Կովկասում 2025» և «Ամենաարագ աճող ֆոնդային բորսա Հարավային Կովկասում 2025»՝ ըստ Global Banking & Finance Awards հեղինակավոր ամսագրի։ Այս մրցանակները կարևորում են AMX-ի առաջատար դերը տարածաշրջանի ֆինանսական շուկայում, ինչպես նաև բորսայի շարունակական զարգացմանն ու նորարարություններին միտված ջանքերը: «Լավագույն ֆոնդային բորսա Հարավային Կովկասում» մրցանակը հաստատում է AMX-ի կայուն գործունեությունը, ներդրողների վստահությունը և կապիտալի շուկայի հասանելիության բարելավմանն ուղղված քայլերը, մինչդեռ «Ամենաարագ աճող ֆոնդային բորսա» կոչումը շեշտադրում է AMX-ի զարգացման դինամիկան, նոր ֆինանսական գործիքների ներդրումը բորսայում և այդպիսով լայն հնարավորությունների ընձեռումը ներդրողներին և թողարկողներին: 2024 թվականին AMX-ն արձանագրել է շուկայի զգալի աճ։ Նախորդ տարում ընդհանուր շուկայական արժեքը հասել է 4.1 տրիլիոն ՀՀ դրամի, իսկ բոլոր շուկաներում արձանագրվել է առևտրի ծավալների և կնքված գործարքների թվի աճ։ Այս հաջողություններին նպաստել են արտարժույթի առևտրային հարթակի վերագործարկումը և նոր թվային ներդրումային լուծումների ներդրումը։ Global Banking & Finance Review-ը Մեծ Բրիտանիայում հիմնադրված հեղինակավոր օնլայն և տպագիր ամսագիր է, որը տրամադրում է անկախ վերլուծություններ ֆինանսական ոլորտի արդի թեմաների վերաբերյալ։ Հաղթողների ընտրությունն իրականացվում է ոլորտի վերլուծաբանների, բանկային խորհրդատուների, ինչպես նաև Global Banking & Finance Review-ի խմբագրական խորհրդի և ղեկավարների կողմից կատարված ուսումնասիրությունների հիման վրա։ AMX-ը շարունակելու է կապիտալի շուկայի հասանելիության ընդլայնումը, տարածաշրջանային ֆինանսական համագործակցության ամրապնդումը և նորարարական առևտրային լուծումների ներդրումը՝ նպաստելով Հայաստանի կապիտալի շուկայի հետագա զարգացմանը։ Ծանոթանալ մրցանակակիրների ամբողջական ցանկին կարող եք հետևյալ հղումով։ Հայաստանի ֆոնդային բորսայի մասին Հայաստանի ֆոնդային բորսան Հայաստանում գործող արժեթղթերի կարգավորվող շուկայի միակ օպերատորն է։ AMX-ն առաջարկում է բորսայական ծառայությունների ամբողջական փաթեթ՝ ցուցակման, առևտրի, քլիրինգային և տեղեկատվական ծառայություններ,  այլընտրանքային բորսայական լուծումներ։ Բորսայական վերջնահաշվարկն իրականացնում է Հայաստանի կենտրոնական դեպոզիտարիան, որի 100% բաժնետերը Հայաստանի ֆոնդային բորսան է։ AMX-ի առաքելությունն է զարգացնել կապիտալի շուկայի բորսայական ենթակառուցվածքը՝ այն դարձնելով ֆինանսավորման ակտիվ գործիք Հայաստանի տնտեսության զարգացման համար։ Լրացուցիչ տեղեկությունների համար խնդրում ենք զանգահարել +374 60 69 55 55 (ներքին` 142) հեռախոսահամարին կամ գրել  [email protected] հասցեին։   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: