2025-ին համաշխարհային պարենային ապրանքների գները միջինում աճել են 4.3%-ով

Մսի գների ինդեքսը դեկտեմբերին նվազել է 1.3%-ով

ՄԱԿ-ի Պարենի և գյուղատնտեսության կազմակերպության (ՊԳԿ, FAO) տվյալներով՝ 2025 թվականին համաշխարհային պարենային ապրանքների գների ինդեքսը միջինում կազմել է 127.2 միավոր, ինչը 4.3%-ով բարձր է 2024 թվականի միջին ցուցանիշից։

Միևնույն ժամանակ, դեկտեմբերին գրանցվել է ամսական նվազում։ FAO-ի պարենային ապրանքների գների ինդեքսը դեկտեմբերին կազմել է 124.3 միավոր, ինչը 0.6%-ով ցածր է նոյեմբերից և 2.3%-ով ցածր՝ նախորդ տարվա նույն ամսից։ Նվազումը պայմանավորված է կաթնամթերքի, մսի և բուսական յուղերի գների անկմամբ, որը գերազանցել է հացահատիկի և շաքարի գների աճը։

Հացահատիկային մշակաբույսեր
Դեկտեմբերին հացահատիկի գների ինդեքսն աճել է 1.7%-ով՝ Սևծովյան տարածաշրջանից ցորենի արտահանման անորոշությունների, եգիպտացորենի կայուն պահանջարկի և բրնձի բոլոր տեսակների թանկացման ֆոնին։ Սակայն ամբողջ 2025 թվականին հացահատիկի գները միջինում եղել են 4.9%-ով ցածր, քան 2024-ին՝ երրորդ անընդմեջ տարեկան անկմամբ։ Բրնձի գների ինդեքսը տարեկան կտրվածքով նվազել է 35.2%-ով՝ պայմանավորված արտահանման առատ առաջարկով և մրցակցության ուժեղացմամբ։

Բուսական յուղեր
Դեկտեմբերին բուսական յուղերի գները նվազել են 0.2%-ով՝ հասնելով վերջին վեց ամիսների նվազագույն մակարդակին։ Սակայն ամբողջ տարվա ընթացքում այս խմբի ինդեքսը միջինում աճել է 17.1%-ով, ինչը վերջին երեք տարիների ամենաբարձր ցուցանիշն է և պայմանավորված է համաշխարհային մատակարարումների սահմանափակմամբ։

Միս
Մսի գների ինդեքսը դեկտեմբերին նվազել է 1.3%-ով, սակայն մնացել է 3.4%-ով բարձր նախորդ տարվա նույն ամսից։ Տարեկան միջինում մսի գները աճել են 5.1%-ով, ինչը կապվում է համաշխարհային պահանջարկի, կենդանիների հիվանդությունների և աշխարհաքաղաքական անորոշությունների հետ։

Կաթնամթերք
Կաթնամթերքի գների ինդեքսը դեկտեմբերին նվազել է 4.4%-ով՝ հիմնականում Եվրոպայում կարագի գների անկման պատճառով։ Այնուամենայնիվ, 2025 թվականի ընթացքում կարագի գները միջինում եղել են 13.2%-ով բարձր, քան 2024-ին՝ բարձր ներմուծման պահանջարկի և տարվա սկզբին սահմանափակ մատակարարումների պայմաններում։

Շաքար
Շաքարի գների ինդեքսը դեկտեմբերին աճել է 2.4%-ով, սակայն տարեկան կտրվածքով նվազել է 17%-ով՝ հասնելով 2020 թվականից ի վեր ամենացածր միջին մակարդակին։ Նվազումը պայմանավորված է արտահանման առատ հնարավորություններով։