Անցնող շաբաթվա այլ կարևոր իրադարձությունները ֆինանսական շուկաների համար Եվրոպական կենտրոնական բանկը նվազեցրել է վերաֆինանսավորման տոկոսադրույքը 0.25 տոկոսային կետով՝ սահմանելով 2.75%: ԵԿԲ նախագահը նշել է, որ չնայած գնաճը մոտենում է թիրախային 2% ցուցանիշին, այնուամենայնիվ համաշխարհային առևտրի հնարավոր «խոչընդոտները» Եվրագոտու երկրներում գնաճի հեռանկարն անորոշ են դարձնում։ ԱՄՆ Դաշնային պահուստային համակարգն անփոփոխ է թողել վերաֆինանսավորման տոկոսադրույքը՝ 4.25-4.5%-ի միջակայքում։ ԴՊՀ-ի նախագահ Ջերոմ Փաուելը նշել է, որ ԴՊՀ-ն չի շտապի նվազեցնել տոկոսադրույքները, քանի դեռ գնաճի և աշխատաշուկայի տվյալները բարենպաստ չեն դրա համար։ ԱՄՆ անձնական սպառողական ծախսերի (PCE) գնի ինդեքսը դեկտեմբերին տարեկան կտրվածքով աճել է 2.6%-ով, իսկ նախորդ ամսվա համեմատ՝ 0.3%-ով՝ գրանցելով վերջին 8 ամիսների ամենամեծ աճը, ինչը ենթադրում է, որ Դաշնային պահուստային համակարգն առաջիկայում չի շտապի նվազեցնել տոկոսադրույքները։ ԱՄՆ տնտեսական աճի տեմպը (2.3%) դանդաղել է Boeng-ի աշխատակիցների գործադուլի հետևանքով, իսկ սպառողական ծախսերն աճել են վերջին 2 տարիների ամենաարագ տեմպով, ինչը պայմանավորված է ներքին պահանջարկի աճով։ 2024թ.-ին ՀՆԱ-ն աճել է 2.8%-ով նախորդ տարվա 2.9% աճից հետո։ ԱՄՆ նախագահ Դոնալդ Թրամփը մաքսատուրքեր է սահմանել Կանադայից և Մեքսիկայից ներմուծվող ապրանքների նկատմամբ 25%-ի չափով, իսկ Չինաստանից ներմուծվող ապրանքների նկատմամբ՝ 10%-ի չափով։ Ի պատասխան այս որոշման՝ Կանադան և Մեքսիկան հայտարարել են, որ իրենք ևս մաքսատուրքեր կկիրառեն ԱՄՆ-ից ներմուծվող ապրանքների վրա, Չինաստանն էլ պատրաստվում է մաքսատուրքերի հարցով դատական հայց ներկայացնել Առևտրի համաշխարհային կազմակերպությունում։ finarm.am