Գնաճ. Թուրքիայի ԿԲ-ն շարունակում է իջեցնել հիմնական տոկոսադրույքը Թուրքիայի Կենտրոնական բանկն իջեցրել է հիմնական դրույքը 1,5 տոկոսային կետով` մինչեւ 9%: Հոկտեմբերի վերջին երկրի ԿԲ-ն այն արդեն իջեցրել էր 1,5 տոկոսային կետով` 12%-ից մինչեւ 10,5%: Ներկա որոշումը կանխատեսելի էր. աշնանը Թուրքիայի նախագահ Ռեջեփ Թայիփ Էրդողանը երկրի Կենտրոնական բանկին կոչ էր արել շարունակել նվազեցնել տոկոսադրույքը եւ մինչեւ տարեվերջ այն սահմանել 10%-ից ցածր մակարդակում: «Զարգացած տնտեսություններով երկրների կենտրոնական բանկերն ընդգծում են, որ գնաճը կարող է շարունակվել աճել ավելի երկար, քան նախկինում ենթադրվում էր` կապված էներգակիրների բարձր գների, առաջարկի եւ պահանջարկի միջեւ անհավասարակշռության եւ աշխատաշուկայում տիրող կոշտ իրավիճակի հետ»,- նշել է Թուրքիայի ԿԲ-ն: Այնուամենայնիվ, տոկոսադրույքի իջեցումն արագացնում է գնաճը երկրում եւ թուլացնում արժույթը: Հոկտեմբերին Թուրքիայում գնաճը տարեկան կտրվածքով կազմել է 85,5%: