Հայաստանի ֆոնդային բորսան ամփոփել է 2024թ.-ի հունվար ամսվա տվյալները

Պետական պարտատոմսերի բորսայական շուկա

  Հայաստանի ֆոնդային բորսայում  հունվարին տեղի ունեցած պետական պարտատոմսերի տեղաբաշխման աճուրդների ընդհանուր ծավալը կազմել է ավելի քան 63,8 մլրդ դրամ, որը գերազանցում է նախորդ տարվա նույն ժամանակահատվածի ցուցանիշը մոտ 251%-ով: Պետական պարտատոմսերի երկրորդային շուկայի բորսայական առևտրի ընդհանուր ծավալը հունվարին կազմել է ավելի քան 9,1 մլրդ ՀՀ դրամ, որը գերազանցում է նախորդ տարվա նույն ժամանակահատվածի ցուցանիշը 1448%-ով։ Առևտրի առկա պետական գանձապետական պարտատոմսերով կնքվել է 45 գործարք:  

Կորպորատիվ պարտատոմսերի բորսայական շուկա

  Նախորդ տարիների նույն ժամանակահատվածի համեմատ կորպորատիվ պարտատոմսերի թե՛ շուկայի և թե՛ առևտրի ծավալները պահել են աճի դինամիկան։ Կորպորատիվ պարտատոմսերի հունվար ամսվա շուկայի ծավալը նախորդ տարվա նույն ժամանակահատվածի համեմատ աճել է մոտ 20%-ով և կազմել է ավելի քան 498 մլրդ դրամ։ Կորպորատիվ պարտատոմսերով իրականացված առևտրի ծավալը կազմել է ավելի քան 2,8 մլրդ դրամ և հաշվետու ժամանակահատվածում կնքվել է 301 գործարք։ Առևտրի ծավալը և կնքված գործարքների քանակը համապատասխանաբար աճել են նախորդ տարվա նույն ժամանակաշրջանի համեմատ 38%-ով և 88%-ով։ Բորսայում շրջանառվող կորպորատիվ պարտատոմսերի քանակը կազմել է 113։  

ՌԵՊՈ գործարքներ

  Ռեպո գործարքների ընդհանուր ծավալը կազմել է ավելի քան 3,1 մլրդ դրամ, որը գերազանցում է նախորդ տարվա նույն ժամանակահատվածի ցուցանիշը 132%-ով: Հունվարին կնքվել է 33 ռեպո գործարք։

Բաժնետոմսերի բորսայական շուկա

  Բաժնետոմսերի առևտրի ծավալը կազմել է ավելի քան 106 մլն դրամ՝ աճելով նախորդ տարվա նույն ժամանակահատվածի համեմատ 85%-ով, իսկ շուկայի կապիտալիզացիան՝ ավելի քան 324 մլրդ դրամ, որը գերազանցում է նախորդ տարվա նույն ժամանակահատվածի ցուցանիշը մոտ 22%-ով։ Բաժնետոմսերով կնքվել է 181 գործարք։