ԱՄՆ փոքր բիզնեսի վստահության ինդեքսը հունիսին նվազել է՝ հասնելով 98.6 միավորի, տեղեկացնում է ԱՄՆ Անկախ Բիզնեսների Ազգային Ֆեդերացիան (NFIB)։ Գլխավոր պատճառներից մեկը եղել է պահեստներում կուտակված ավելցուկային ապրանքների աճը՝ հունիսին յուրաքանչյուր ութերորդ ընկերությունը նշել է, որ ունի «չափից շատ» պաշարներ, ինչը կրկնապատկվել է մայիսի ցուցանիշի համեմատ։ Բացի այդ, վաճառքների աճի սպասումները նվազել են՝ հունիսին հասնելով ընդամենը 7%-ի, նախորդ ամսվա 10%-ի փոխարեն։ NFIB-ը նաև արձանագրել է բիզնեսի` սեփական վիճակի մասին ընկալումների վատթարացում․ միայն 49%-ն է իր վիճակը գնահատել «լավ» և 8%-ը՝ «գերազանց», մայիսի 55% և 14%-ի համեմատ։ Փոքր բիզնեսի ղեկավարների 19%-ը հիմնական խնդիրը համարել է հարկերը, իսկ ինֆլյացիան մտահոգել է 11%-ին, ինչը վերջին տարիների ամենացածր ցուցանիշն է։ Աղբյուրը՝ Reuters, NFIB