Պետական եկամուտների կոմիտեն (ՊԵԿ) տեղեկացնում է, որ Հարկային օրենսգրքում կատարված փոփոխությունների արդյունքում 2025 թվականի հունվարի 1-ից կգործարկվի հարկային պարտավորությունների հաշվառման նոր՝ անձնական հաշվի քարտի համակարգը:
Նոր համակարգը միտված է պարզեցնել և ավելի համակարգված դարձնել հարկային պարտավորությունների հաշվառման գործընթացը հարկ վճարողների համար։
Ի՞նչ հնարավորություններ են ապահովվելու նոր համակարգով
Նոր համակարգի ներդրմամբ կատարվել են մի շարք բարեփոխումներ, որոնք կբերեն հետևյալ փոփոխությունները՝
- Առանձնացված հաշվառման կարգավորումներ
Գործող մեկ անձնական հաշվի քարտի փոխարեն կգործեն երկու տարբեր քարտեր՝- Հարկատեսակների անձնական հաշվի քարտ (հաշվարկներով առաջացած պարտավորությունների համար),
- Վարչական ակտի անձնական հաշվի քարտ (վարչական ակտով առաջացած պարտավորությունների համար):
- Վճարման նոր հաշվեհամարներ
- Վարչական ակտով առաջացած պարտավորությունների համար վճարումները կկատարվեն 900008000771 վարչական ակտերի միասնական հաշվին,
- Հարկային պարտավորությունների համար՝ 900008000490 հարկատեսակների միասնական հաշվին։
- Վճարման առաջնահերթության ընտրություն
Հարկ վճարողները հնարավորություն կունենան ինքնուրույն որոշել, թե որ հարկատեսակների պարտավորությունները մարել առաջնահերթ՝ մինչև դրանց վճարման վերջնաժամկետը։ - Հաշվառման ճշգրտումներ դելտայով
Հարկային պարտավորությունների ճշտումները կկատարվեն միայն տարբերության չափով (դելտայով), այլ ոչ թե ամբողջ ժամանակահատվածի վերահաշվարկով։ - ԱԱՀ հաշվանցման կարգի փոփոխություն
ԵԱՏՄ անդամ պետություններից ներմուծված ապրանքների մասով ԱԱՀ-ի հաշվանցումը կիրականացվի ներմուծման օրը ներառող հաշվետու ամսում, եթե փաստաթղթերը կներկայացվեն և ԱԱՀ-ն կվճարվի ներմուծման ամսում:
Ժամանակավոր սահմանափակումներ
Նոր համակարգի ներդրմամբ պայմանավորված՝ ՊԵԿ-ը տեղեկացնում է, որ 2024 թվականի դեկտեմբերի 31-ից մինչև 2025 թվականի հունվարի 5-ը անհասանելի կլինեն հետևյալ համակարգերը՝
- ՊԵԿ հաշվետվությունների ներկայացման էլեկտրոնային համակարգը,
- Ֆիզիկական անձանց էլեկտրոնային ծառայությունների միասնական համակարգը,
- My Tax հավելվածը (տաքսի ծառայության ամսական հայտարարությունների ներկայացման համար):
Անհատական հաշվի տեղեկատվական պորտալը հասանելի չի լինի ավելի երկար՝ դեկտեմբերի 31-ից մինչև 2025 թվականի հունվարի 15-ը։ Այս ընթացքում ֆիզիկական անձինք չեն կարողանա ներկայացնել հիփոթեքային վարկի գծով եկամտային հարկի վերադարձի դիմումները։
Չնայած սահմանափակումներին, հարկ վճարողները կարող են շարունակել օգտվել e-invoicing և ՀԴՄ համակարգերից։
ՊԵԿ-ը հայցում է հարկ վճարողների ներողամտությունը հնարավոր անհարմարությունների համար և վստահեցնում է, որ աշխատանքներն իրականացվում են տոնական օրերին՝ առավելագույնս նվազեցնելու անհարմարությունները։
