Tesla-ի և SpaceX-ի հիմնադիր Իլոն Մասկը ասել է, որ մոտ ապագայում մարդկությանը անհրաժեշտ է օգտագործել նավթն ու գազը, քանի որ եթե այդ էներգիայի աղբյուրները չկիրառվեն, քաղաքակրթությունը կարող է փլուզվել։ Գործարարի խոսքերը մեջբերում է Reuters-ը։
Մասկը իր դիրքորոշումն է հայտնել Նորվեգիայի Ստավանգեր քաղաքում տեղի ունեցած էներգետիկ համաժողովի ժամանակ։
«Եթե իրատեսորեն նայեք, ապա կարծում եմ, որ կարճաժամկետ հեռանկարում մեզ անհրաժեշտ կլինի նավթ և գազ օգտագործել, քանի որ հակառակ դեպքում քաղաքակրթությունը կփլուզվի», — կանխատեսել է Tesla-ի հիմնադիրը:
Մասկը նշել է, որ Նորվեգիայում նավթի հորատման վերաբերյալ լրացուցիչ հետազոտություններ են անհրաժեշտ: Նրա խոսքով ՝ էներգիայի կայուն աղբյուրներին անցումը մարդկության ամենամեծ մարտահրավերներից է, գործընթացը կարող է տեւել մի քանի տասնամյակ։
Նախկինում Մասկը կոչ էր արել աշխարհի բոլոր ատոմակայանները միացնել ամբողջ հզորությամբ։ Նա ասել է, որ երկրները պետք է մեծացնեն ատոմային էներգիայի արտադրությունը, և ազգային անվտանգության տեսանկյունից խելագարություն է անվանել այդ ձեռնարկությունները փակելը։
