ՀՀ Կենտրոնական բանկի նախագահ Մարտին Գալստյանն ասել է, որ «աշխարհում ընթանում են աշխարհաքաղաքական, ֆինանսական եւ տեխնոլոգիական փոփոխություններ, եւ մենք նույնպես զերծ չենք մնում` գտնվում ենք այդ փոփոխությունների հորձանուտում»:
«Լինելով ինքնակրթվող հաստատություն, մենք շարունակաբար ձգտում ենք գերազանցության՝ առաջատար հետազոտությունների եւ նորարարական լուծումների իրագործման միջոցով: Մենք հանդես ենք գալիս ապագային միտված նախաձեռնություններով՝ պահպանելով տնտեսական կայունության մեր հանձնառությունը», — ասել է Մարտին Գալստյանը՝ նոյեմբերի 22-ին ելույթ ունենալով ՀՀ դրամի 30-ամյակին նվիրված միջոցառմանը:
«Կենտրոնական բանկը շարունակելու է լինել վստահելի գործընկեր մեր հանրության, բիզնեսի եւ կառավարության համար՝ ապահովելով գների եւ ֆինանսական կայունությունը: Մենք հավատարիմ ենք մնում տնտեսական կայունության ու բարեկեցության ապահովմանը նպաստելու մեր առաքելությանը, եւ մենք անելու ենք ամենը, որպեսզի իրացնենք մեր երկրի եւ ամեն մի դրամի ներուժը», — նշել է Կենտրոնական բանկի նախագահը:
