ՀՀ աշխատանքային օրենսգրքում կատարված փոփոխությունների շրջանակում դեկտեմբերի 1-ից ուժի մեջ կմտնեն փորձնակության (internship) ինստիտուտի ներդրման համապատասխան կարգավորումները։
Աշխատանքի եւ սոցիալական հարցերի նախարարությունից հայտել են, որ կարգավորումների ներդրման նպատակն է նպաստել կրթություն-աշխատաշուկա կապի արդյունավետությանը, որակյալ աշխատուժի ձեւավորմանն ու աշխատաշուկայում մրցունակության բարձրացմանը։ Դրանք նաեւ միտված են աջակցել երիտասարդներին կամ առաջին անգամ աշխատաշուկա մուտք գործող անձանց՝ ծանոթանալու աշխատաշուկայի միտումներին եւ հեշտությամբ ինտեգրվել։
Համապատասխան դրույթներով սահմանվում են գործատուի կողմից փորձնակ ներգրավելու հետ կապված հարաբերությունները։ Ըստ այդմ, փորձնակն այն անձն է, ով նախնական մասնագիտական, միջին մասնագիտական կամ բարձրագույն մասնագիտական կրթական ծրագրեր իրականացնող ուսումնական հաստատությունում սովորելու ընթացքում կամ ավարտելուց հետո 1 տարվա ընթացքում, գործատուի կողմից ներգրավվում է աշխատանքում՝ որոշակի մասնագիտությամբ, որակավորմամբ կամ պաշտոնի անվանմամբ աշխատանքային փորձառություն ձեռքբերելու նպատակով։
Միաժամանակ սահմանվում է, որ՝
• գործատուն իրավունք ունի կազմակերպել աշխատանքային պրակտիկա՝ մինչեւ 2 ամիս ժամկետով, ոչ ավելի քան 1 անգամ՝ պայմանագիր կնքելով փորձնակի հետ՝ առանց երկարաձգման իրավունքի,
• գործատուի մոտ փորձնակների թիվը չի կարող գերազանցել տվյալ պահին աշխատողների թվի 10%-ը,
• փորձնակն աշխատանքի է ներգրավվում եւ աշխատանքային փորձառություն է ձեռք բերում ոչ ավելի, քան շաբաթական 5 օր, օրական 4 ժամ եւ շաբաթական 20 ժամ տեւողությամբ՝ պահպանելով հանգստի եւ սնվելու համար ընդմիջումները,
• գործատուի մոտ աշխատանքային փորձառություն ձեռքբերելու ժամանակահատվածը փորձնակի համար աշխատանքային ստաժ չի համարվում,
• փորձնակի վարձատրության հարցը որոշվում է կողմերի համաձայնությամբ։
