Ակնկալվում է, որ մինչև տասնամյակի վերջ զարգացող և զարգացած շուկայական տնտեսություններում շուրջ երկու տասնյակ Կենտրոնական բանկեր շրջանառության մեջ կունենան թվային արժույթներ: Ամբողջ աշխարհի Կենտրոնական բանկերն ուսումնասիրում և աշխատում են իրենց արժույթների թվային տարբերակների վրա՝ դրանց մանրածախ օգտագործման համար՝ կանխիկացման կրճատման արագացման պայմաններում, հայտնում է Reuters-ը:
Ոմանք նաև քննարկում են ֆինանսական հաստատությունների միջև գործարքների մեծածախ տարբերակները: Կենտրոնական բանկի նոր թվային արժույթների (CBDC) մեծ մասը կհայտնվի մանրածախ առևտրի ոլորտում, որտեղ տասնմեկ կենտրոնական բանկեր կարող են միանալ Բահամյան կղզիներում, Արևելյան Կարիբյան ավազանում, Ճամայկայում և Նիգերիայում գտնվող գործընկերներին, որոնք արդեն օգտագործում են իրական ժամանակի թվային մանրածախ արժույթներ:
Ինչ վերաբերում է մեծածախ առևտրին, ապա միջսահմանային վճարումների ընդլայնումը մեծածախ CBDC-ների վրա Կենտրոնական բանկերի աշխատանքի հիմնական գործոններից մեկն է: Շվեյցարիայի Ազգային բանկը հունիսի վերջին հայտարարել էր, որ փորձնական ծրագրի շրջանակներում կթողարկի մեծածախ CBDC-ներ շվեյցարական թվային բորսայում, մինչդեռ Եվրոպական կենտրոնական բանկը գտնվում է թվային եվրոյի փորձնական ծրագրի մեկնարկի ճանապարհին՝ 2028թ․-ին հնարավոր գործարկումից առաջ:
Չինաստանի թվային արժույթի փորձարկումն այժմ ընդգրկում է 260 միլիոն մարդ, իսկ մյուս երկու խոշոր զարգացող տնտեսությունները ՝ Հնդկաստանը և Բրազիլիան, նախատեսում են թվային արժույթները գործարկե լհաջորդ տարի: Կրիպտոարժույթների հետ կապված մի շարք ճգնաժամային իրադարձություններն էական ազդեցություն չեն ունեցել ավանդական ֆինանսական շուկաների վրա։ Դրանք հանգեցրել են բազմաթիվ կրիպտոակտիվների վաճառքի:
