2025-ի հունվարից սեպտեմբեր Վրաստանից Հայաստան է ներմուծվել 42 մլն դոլարի ավտոմեքենա

Վրաստանից ավտոմեքենաներ են վերաարտահանվել հիմնականում Կենտրոնական Ասիայի և հարևան երկրների շուկաներ։

Վրաստանի ազգային վիճակագրական ծառայության հրապարակած տվյալներով՝ 2025 թվականի հունվար-սեպտեմբեր ամիսներին երկրից արտահանվել է 82 527 ավտոմեքենա, որոնց ընդհանուր արժեքը կազմել է 2.003 միլիարդ ԱՄՆ դոլար։

Սա զգալի աճ է նախորդ տարիների համեմատ․ 2024-ի նույն ժամանակահատվածում վերաարտահանվել էր 78 610 ավտոմեքենա՝ 1.762 միլիարդ դոլարի, 2023-ին՝ 79 316 ավտոմեքենա՝ 1.566 միլիարդ դոլարի, 2022-ին՝ 58 153 ավտոմեքենա՝ 592.3 միլիոն դոլարի, իսկ 2021-ին՝ 45 408 ավտոմեքենա՝ 338.2 միլիոն դոլարի։

Տվյալները ցույց են տալիս, որ վերջին հինգ տարվա ընթացքում Վրաստանը շարունակաբար մեծացնում է ավտոմեքենաների վերաարտահանման ծավալներն ու ընդհանուր եկամուտը։

2025-ի առաջին ինը ամիսներին Վրաստանից ավտոմեքենաներ են վերաարտահանվել հիմնականում Կենտրոնական Ասիայի և հարևան երկրների շուկաներ։ Առաջատար հնգյակը հետևյալն է․

• Ղրղզստան՝ 31 371 ավտոմեքենա, 1.016 միլիարդ դոլար, միջին գին՝ 32.3 հազար դոլար,

• Ղազախստան՝ 33 375 ավտոմեքենա, 567 միլիոն դոլար, միջին գին՝ 17 հազար դոլար,

• Ադրբեջան՝ 6 367 ավտոմեքենա, 170 միլիոն դոլար, միջին գին՝ 26.7 հազար դոլար,

• Տաջիկստան՝ 4 296 ավտոմեքենա, 88 միլիոն դոլար, միջին գին՝ 20.6 հազար դոլար,

• Հայաստան՝ 2 055 ավտոմեքենա, 42 միլիոն դոլար, միջին գին՝ 20.5 հազար դոլար։

Վրաստանի ավտոմեքենաների վերաարտահանումը վերջին տարիներին դարձել է երկրի արտաքին առևտրի կարևոր ուղղություններից մեկը։ Աճի դինամիկան պայմանավորված է ինչպես տարածաշրջանային պահանջարկի բարձրացմամբ, այնպես էլ Վրաստանի տարածքով միջազգային ավտոարտահանման ցանցերի ընդլայնմամբ։